თბილისის ვიცე-მერმა ირაკლი ხმალაძემ განაცხადა, რომ საჯარო პარკინგის ფასი კომერციული პარკინგის საფასურს მიუახლოვდება. მისი თქმით, არსებობს კომერციული მიწის ზედა და მიწის ქვეშა პარკინგები, რომლის საათობრივი საფასური მნიშვნელოვნად აღემატება მუნიციპალური პარკირების წლიურ საფასურს. ამის შესახებ მან გადაცემა საქმის კურში განაცხადა.

"შესაძლებელი არის, რომ დაახლოებით იმ ზღვარში იმსჯელოს საკრებულომ, რომელიც დღეს კომერციული პარკირების საფასური არის დადგენილი კერძო მეწარმეების მიერ", - ამბობს ხმალაძე.

ვიცე მერის თქმით, ამ სისტემის მიღების შემთხვევაში მერია შეღავათიან ტარიფებს არ განიხილავს მათთვის, ვისაც მოუწევთ პარკირებით სარგებლობა. როგორც ხმალაძე აცხადებს, ეს იქნება სტიმული, რომ ნაკლებმა მანქანამ იმოძრაოს ქალაქში და ნაკლებად დაბინძურდეს ჰაერი.