ნიუს პორტალი Observer-ის ავტორი ჯონ შინდლერი წერს, რომ ამერიკის შეერთებული შტატების პრეზიდენტობის კანდიდატის, ჰილარი კლინტონის საარჩევნო კამპანიის შეფის, ჯონ პოდესტას დაარსებულ ლობისტურ კომპანიას Podesta Group-ს რუსულ სბერბანკთან აქვს გაფორმებული კონტრაქტი.

გამოცემის ცნობით, ამის შესახებ პანამის დოკუმენტებიდან გახდა ცნობილი. საბუთების მიხედვით, პოდესტას ფირმამ და რუსულმა ბანკმა კონტრაქტი ერთი თვის წინ, მარტში გააფორმეს. კონტრაქტის მიხედვით სბერბანკის ანგარიშს ლობისტურ ფირმაში ჯონ პოდესტას ძმა, ენტონი პოდესტა ემსახურება.

სბერბანკმა პოდესტას ლობისტური კომპანია რუსეთის წინააღმდეგ დაწესებული სანქციებთან დაკავშირებით დაიქირავა.

დოკუმენტში სბერბანკის გარდა სამი აფილირებული კომპანიაა ჩამოთვლილი:

  • SB International - ლუქსემბურგი.
  • SBGB - კვიპროსი
  • Troika Dialogue Group - კაიმანის კუნძულები.

ობზერვერის ინფორმაციით, პანამის დოკუმენტებიდან ჩანს, რომ ტროიკა გრუფი და სბერბანკი რუსეთის ფედერაციის პრეზიდენტთან, ვლადიმერ პუტინთან და მის ახლო გარემოცვასთანაა კავშირში. ტროიკა გრუფის აქტივები ამჟამად Avto Group-ს ეკუთვნის, რომელიც პუტინის ქალიშვილის ნათლიის სერგეი როლდუგინის მფლობელობაშია.

თავად კლინტონის გვარი მოსაკ ფონსეკას დოკუმენტებში არ ფიგურირებს, მაგრამ პოდესტას და მისი ფირმის გარდა იქ სიდნი ბლუმენთალიცაა ნახსენები, რომელიც კლინტონების ოჯახის ახლო წრის წევრია. ის პრეზიდენტი კლინტონის თანაშემწე იყო 1997-2001 წლებში.

სიდნი ბლუმენთალი ჰილარი კლინტონის ელ-ფოსტის მიმოწერის გაჟონვის შემდეგაც მოექცა ყურადღების ცენტრში. სწორედ მან შეასრულა შუამავლის როლი ბიძინა ივანიშვილსა და ჰილარი კლინტონს შორის, როდესაც 2012 წლის საპარლამენტო არჩევნებამდე ივანიშვილის წერილი სახელმწიფო მდივანის პოსტზე მყოფ კლინტონს გადაუგზავნა.