ბრიტანელი მყვინთავი, ვერნ ანსვორტი, რომელიც ტაილანდის მღვიმიდან ბავშვების გამოყვანის სამაშველო ოპერაციაში მონაწილეობდა, ბიზნესმენსა და გამომგონებელს ილონ მასკს სასამართლოში უჩივის. მასკმა მყვინთავს პედოფილი უწოდა.

ანსვორტი მასკისგან 75 ათასი დოლარის ოდენობის კომპენსაციას მოითხოვს. გარდა ამისა, მას სურს, რომ სასამართლომ ბიზნესმენს მყვინთავზე შეურაცხმყოფელი პოსტების წერა აუკრძალოს.

ტაილანდელი ბავშვების სამაშველო ოპერაციის დროს ილონ მასკმა მისი კომპანიის მიერ გამოგონილი მინი წყალქვეშა ნავის გამოყენება შესთავაზა. ანსვორტმა მისი იდეა გააკრიტიკა, რის შემდეგაც მასკმა მყვინთავს პედოფილი უწოდა. ამის გამო გამომგონებელი ბევრმა გააკრიტიკა. რამდენიმე კვირის შემდეგ კი მან ბოდიშიც მოიხადა, თუმცა რამდენიმე დღის წინ მყვინთავზე ისევ დაიწყო შეურაცხმყოფელი პოსტების წერა ტვიტერზე.

ტაილანდელი ბავშვების ისტორია

23 ივნისს ტაილანდის გამოქვაბულში გაუჩინარებული 12 ფეხბურთელი ბავშვი და მათი მწვრთნელი ცხრადღიანი ძებნის შემდეგ, გამოქვაბულის სიღრმეში ბრიტანელმა მყვინთავებმა ცოცხლები იპოვეს. ისინი ტურისტებისთვის კარგად ნაცნობ გამოქვაბულში საფეხბურთო ვარჯიშის შემდეგ მწვრთნელთან ერთად შევიდნენ, თუმცა მუსონური წვიმების გამო, წყლის დონემ მოულოდნელად მოიმატა და გარეთ გამოსვლა ვეღარ მოახერხეს.

7 ივლისს საღამოს დაწყებულმა წვიმამ, რომელიც კვირას გაგრძელდა ტაილანდის ხელისუფლება აიძულა ოპერაცია ნაჩქარევად დაეწყო. სამაშველო ოპერაცია სრულ სიბნელეში სიარულს, ცოცვას, ცურვას და ყვინთვას გულისხმობდა. მაშველებს და ბიჭებს სახეზე სპეციალური ნიღბები ეკეთათ, ასევე თან ჰქონდათ ჟანგბადის ბალონები. თითოეულ ბიჭს ორი მაშველი აცილებდა.

სამდღიანი სამაშველო ოპერაცია კი წარმატებით დასრულდა. ტაილანდის გამოქვაბულში ჩარჩენილი 12 ბავშვი და მწვრთნელი გამოქვაბულიდან 17 დღის შემდეგ გამოიყვანეს.

ამავე თემაზე: