საქართველოს ყოფილი თავდაცვის მინისტრი, ირაკლი ოქრუაშვილი რუსთავი 2-თან მიცემულ ინტერვიუში 2008 წლის ომის შემდეგ, პარიზში სალომე ზურაბიშვილთან შეხვედრას იხსენებს, სადაც პრეზიდენტობის კანდიდატმა აფხაზეთი "განგრენად" მოიხსენია.

"ზურაბიშვილმა საკმაოდ თავდაჯერებულად დაიწყო იმის მტკიცება, რომ ჩვენ თუ გვინდა ქვეყანა განვავითაროთ, ჩვენ თუ გვინდა სრულფასოვანი სახელმწიფო შევქმნათ, უარი უნდა ვთქვათ იმ განგრენაზე, რომელიც მარჯვენა ხელზე გვკიდია", - განაცხადა ირაკლი ოქრუაშვილმა.

მისი თქმით, ეს განცხადება მოულოდნელი იყო, მაგრამ არა სიურპრიზი. ოქრუაშვილი ფიქრობს, რომ სალომე ზურაბიშვილი რუსეთის ნარატივს ავითარებს საქართველოში.

"მეხუთე კოლონა ძლიერია, მაგრამ ჩვენ იმიტომ ვართ, რომ ამას ვებრძოლოთ. ის რომ ჩვენი მარჯვენა ხელი დაავადებულია არავინ უარყოფს, მაგრამ ეს იმას არ ნიშნავს, რომ შვილი რომელიც ავადმყოფია გადაადგო", - განაცხადა ოქრუაშვილმა.

საქართველოს პრეზიდენტობის კანდიდატმა სალომე ზურაბიშვილმა, რომელსაც მხარს ქართული ოცნება უჭერს, ტოკ-შოუ რეაქციაში 2008 წლის ომზე კიდევ ერთხელ ისაუბრა და განაცხადა, რომ ქართულმა მხარემ თავისი მოსახლეობა დაბომბა, რაც ფაქტებითაა დასაბუთებული.

კითხვა, თუ ვინ დაიწყო ომი, საქართველომ თუ რუსეთმა, სალომე ზურაბიშვილს მაშინ დაუსვეს, როცა მან საპრეზიდენტო არჩევნებში საკუთარი კანდიდატურა წარადგინა.