პარლამენტთან მიმდინარე აქცია სახელწოდებით #მამებისიმართლისთვის დასრულდა და ხვალ, 13 სექტემბერს 19:00-ზე ისევ განახლდება. ზაზა სარალიძე და მალხაზ მაჩალიკაშვილი რჩებიან პარლამენტის შემობასთან და აგრძელებენ შიმშილობას.

ზაზა სარალიძემ კიდევ ერთხელ გამოთქვა უკმაყოფილება აქციაზე ხალხის სიმცირის გამო და საზოგადოებას გვერდში დგომისკენ მოუწოდა.

"ეს არ არის ქვეყანა, სადაც შვილებს გვიკლავენ და ლოგინში გვიხრიტავენ. ჩვენ ვერ გაგვტეხავს ვერავინ, ჩვენ ვერ გაგვანადგურებს ვერავინ იმიტომ, რომ როცა ჩვენი შვილი მოკლეს იმ დღიდან განადგურებულები ვართ. გაიგოს ხელისუფლებამ, რომ მკვდარი მეორედ არ კვდება", - განაცხადა ზაზა სარალიძემ.

სარალიძემ განაცხადა, რომ ის აგრძელებს აქციას და პარლამენტთან იქამდე იდგება, სანამ "კვლელი ხელისუფლება" პასუხისგებაში არ იქნება მოცემული.

"ინტერნეტსივრცეში ტელევიზიებში გაისმა, რომ პოლიტიკური არის აქცია და არ მივალთო. ეს არ არის პოლიტიკური აქცია. ჩვენ არ ვართ პოლიტიკოსები. პოლიტიკოსები, ვისაც გული შესტკივათ ჩვენი ქვეყნისთვის, დღეს აქ უნდა იყვნენ, მაგრამ ვერ ვხედავ ვერავის", - ამბობს ზაზა ზარალიძე.

ხორავას ქუჩაზე მოკლულის დავით სარალიძის მამამ, ზაზა სარალიძემ, მალხაზ მაჩალიკაშვილთან ერთად საქართველოს პარლამენტთან აქციები 10 სექტემბრიდან განაახლა. მათი მოთხოვნაა გადაგდეს ხელისუფლება და დაისაჯონ თემირლან მაჩალიკაშვილისა და დავით სარალიძის მკვლელები.

აქციების დაწყებამდე ერთი დღით ადრე ხორავას ქუჩის საქმეზე შექმნილმა საგამოძიებო კომისიას მუშაობა დაასრულა და დასკვნები და რეკომენდაციები წარადგინა.

ქართულმა ოცნებამ დასკვნის საკუთარი ვერსია წარადგინა იმ მიზეზით, რომ ისინი არ ეთანხმებიან ოპოზიციის მიერ შემუშავებულ დოკუმენტს და მას "პოლიტიკურად მიკერძოებულს" უწოდებენ.

საგამოძიებო კომისია

პარლამენტში ხორავას ქუჩაზე მოკლული ორი მოზარდის საქმესთან დაკავშირებით პარლამენტის დროებითი საგამოძიებო კომისია 6 ივნისს შეიქმნა.

საქართველოს კანონმდებლობით კომისია ვალდებულია, შექმნიდან ზუსტად სამი თვის თავზე წარმოადგინოს დასკვნა. ბოლო თვეების განმავლობაში კომისიის წინაშე წარგნენ, როგორც საგამოძიებო ორგანოების თანამდებობის პირები, ისე ხორავას ქუჩაზე მომხდარი მკვლელობის მოწმეები და აღმასრულებელი ხელისუფლების წარმომადგენლები. კომისიის ერთ-ერთ ბოლო საჯარო სხდომაზე გამოკითხეს შინაგან საქმეთა მინისტრი გიორგი გახარია და ყოფილი მთავარი პროკურორი, ირაკლი შოთაძე.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

მთავარი პროკურორი ირაკლი შოთაძე, რომლის უწყების პოზიციაც სასამართლომ ბოლომდე არ გაიზიარა, თანამდებობიდან გადადგა. მკვლელობის საქმეზე ახალი გარემოებების დადგენის მიზნით, შსს-მ ხელახალი გამოძიება დაიწყო, რომელსაც უშუალოდ გიორგი გახარია ხელმძღვანელობს. გამოძიების ფარგლებში მირზა სუბელიანი დანაშაულის შეუტყობინებლობისთვის, ხოლო მერაბ მორჩაძე მოწმეზე ზემოქმედების ბრალდებით დააკავეს