საქართველოს პრეზიდენტმა, გიორგი მარგველაშვილმა განაცხადა რომ ის მარიხუანის ლეგალიზაციის მომხრე არ არის. ამის შესახებ მან ინგა გრიგოლიას გადაცემა რეაქციაში ისაუბრა.

"მე ყოველთვის ვიყავი დეკრიმინალიზაციის მომხრე, რომ ადამიანი ციხეში არ იჯდეს ამ თემაზე, მაგრამ რაც შეეხება ლეგალიზაციას ერთმნიშვნელოვნად მინდა გითხრათ, რომ საქართველოსთვის ეს ადრეა და ძალიან რთული გადაწყვეტილებაა. ამ ორს შორის არსებობს დიდი ზღვარი და განსხვავება".

მარგველაშვილის თქმით, მას არ აქვს ზუსტი ინფორმაცია იმის შესახებ თუ რას გულისხმობს მთავრობის ინიციატივა მარიხუანის სამედიცინო მიზნებისთვის წარმოებაზე.

"საერთოდ არ ვიცი რა შინაარსის მატარებელია, მაგრამ ლეგალიზაცია სხვა არის და ჩემი აზრით ძალიან პრობლემურია ასე უცებ ლეგალიზება", - განაცხადა პრეზიდენტმა.

30 ივლისს საკონსტიტუციო სასამართლომ პარტია გირჩის წევრების სარჩელი დააკმაყოფილა, რითაც მარიხუანის მოხმარებისთვის ადმინისტრაციული სასჯელის გაუქმა და მოხმარება ლეგალური გახდა. სასამართლოს ამ შემთხვევაში არ უმსჯელია მარიხუანის მოპოვების გზებზე. შესაბამისად, შეძენა-შენახვა-კულტივაცია და რეალიზაცია კვლავ დასჯადია.

საქართველოს შინაგან საქმეთა სამინისტრო სამთავრობო გუნდთან ერთად მუშაობს კანონპროექტზე, რომელიც მარიხუანასგან წარმოებული მედიკამენტების ექსპორტზე გატანას გულისხმობს. ჯანდაცვის კომიტეტის თავმჯდომარე აკაკი ზოიძე ამბობს, რომ ინიციატივა მარიხუანას მოხმარების შემზღუდველ კანონპროექტთან ერთად მთავრობის სხდომაზე იქნება წარდგენილი.