"თქვენ IPN წაიკითხეთ, თუ — არა?" — ასე უპასუხა საქართველოს პატრიარქის მდივანმა, მიქაელ ბოტკოველმა On.ge-ს კითხვას, რომელიც მარიხუანის მედიკამენტების საწარმოებლად გამოყენებას შეეხებოდა. მისი თქმით, ამ საკითხზე უკვე ისაუბრა სხვა მედიასთან და მას უნდა დავყრდნობოდით.

მიქაელ ბოტკოველი საპატრიარქოს მდივანია და საპატრიარქოს პოზიციას ოფიციალურად წარადგენს. სწორედ ბოტკოველი ურთიერთობს მედიასთან.

ბოტკოველმა არ დაიჯერა, რომ On.ge-ს ჟურნალისტს სხვა მედიასაშუალებაში საპატრიარქოს პოზიცია უკვე წაკითხული არ ჰქონდა.

"რატომ მატყუებ?.. ახლა თქვენ ხართ 100 საინფორმაციო საშუალება, ხომ არ შემიძლია ყველას გითხრათ ერთი და იგივე. ყველამ IPN-ის ინფორმაცია გამოიყენა, რუსთავი 2-მაც კი", — განაცხადა ბოტკოველმა.

On.ge-მ ბოტკოველს განუმარტა, რომ სხვა მედიასაშუალებას არ ეყრდნობა როცა კომენტარის ჩაწერა თავადაც შეუძლია. ბოტკოველს მიაჩნია, რომ როცა საპატრიარქოს პოზიციას ერთი მედია აქვეყნებს, სხვებმა უნდა გამოიყენონ.

საქართველოს პატრიარქის მდივანმა On.ge-ს კითხვას მხოლოდ რამდენიმეწუთიანი საუბრის ბოლოს უპასუხა და აღნიშნა, რომ ამ საკითხზე ხვალ, 12 სექტემბერს კონფერენციაზე იმსჯელებენ.