ბოლო ერთ კვირაში ხულოში ერთი მეჩეთი და ორი ტაძარი გაქურდეს. ინფორმაციას On.ge-ს შინაგან საქმეთა სამინისტრო უდასტურებს.

მეჩეთის გაქურდვის შემთხვევა, შსს-ს ცნობით, დაახლოებით ერთი კვირის წინ, სოფელ ბეღლეთში მოხდა. საქმეზე დაკავებულია ერთი პირი, რომელიც დანაშაულს აღიარებს. როგორც შსს-მ On.ge-ს განუცხადა, ბრალდებულმა სალოცავში შემოწირულობათა ყუთი გატეხა და თანხა წაიღო.

რაც შეეხება დანარჩენ ორ შემთხვევას, სხალთის ეპარქიის მიერ გავრცელებული ინფორმაციით, ყოვლადწმინდა ღვთისმშობლის ხარებისა და წმინდა ანდრია პირველწოდებულის ტაძრები ხულოში 9 სექტემბერს, ღამის საათებში გაქურდეს. ეპარქიის ცნობით, ორივე ტაძარში გაქურდვამდე ფანჯრიდან გადავიდნენ.

შინაგან საქმეთა სამინისტროს ცნობით, სამივე საქმეზე გამოძიება საქართველოს სისხლის სამართლის კოდექსის 177-ე, ქურდობის მუხლით მიმდინარეობს.

სხალთის ეპარქიის განცხადებით, გასულ წელს სხალთის მონასტრის ტაძარიც გაქურდეს, თუმცა საქმეზე ჯერ არავინ დაუკავებიათ.