დღევანდელ, 9 სექტემბრის საქართველო-ლატვიის მატჩზე, 17:00 საათის მონაცემებით 54 ათასი ბილეთიდან 40 ათასი გაიყიდა. ამის შესახებ On.ge-ს საქართველოს ფეხბურთის ფედერაციაში განუცხადეს.

დღეს, 9 სექტემბერს 20:00 საათზე გასამართ მატჩზე მოქალაქეთა ნაწილი გურამ კაშიას მხარდასაჭერად მიდის, მეორე ნაწილი კი, ჰომოფობიური და ქსენოფობიური იდეების მატარებელი გაერთიანების, ქართული მარშის ორგანიზებით იკრიბება, მათ ფეხბურთელის წინააღმდეგ პროტესტის გამოხატვა სურთ.

საქართველოს ფეხბურთის ფედერაციის პრეზიდენტი, ლევან კობიაშვილი მოუწოდებს გულშემატკივრებს, დაიცვან წესრიგი. კობიაშვილის თქმით, წინააღმდეგ შემთხვევაში თამაშის დელეგატმა შესაძლოა, თამაში ჩაშალოს.

შინაგან საქმეთა სამინისტროს ინფორმაცით, დღეს, 9 სექტემბერს დინამო არენასთან დაგეგმილი აქციის დროს გამოხატვის თავისუფლების ჩარჩოების გადაცდომებს უმკაცრესი რეაგირება მოჰყვება. ამ შინაარსის განცხადება უწყებამ მატჩის დაწყებამდე რამდენიმე საათით ადრე გაავრცელა.

ერთა ლიგის ისტორიაში პირველი თამაში საქართველოსა და ყაზახეთს შორის გაიმართა, რომელიც საქართველომ მოიგო და თამაში 2:0 დაამთავრდა. ერთა ლიგის ისტორიაშიც პირველი გოლის ავტორი ქართველი ფეხბურთელი 19 წლის გიორგი ჩაკვეტაძეა.