თავდაცვის სამინისტროს იურიდიული დეპარტამენტის ყოფილ თანამშრომელს ვალუტის გადამცვლელი ჯიხურის ძარცვა ედება ბრალად.

ფაქტს ადასტურებენ მთავარ პროკურატურაშიც. საგამოძიებო ორგანოს განცხადებაში ნათქვამია, რომ სამინისტროს იმდროინდელი თანამშრომელი ძარცვიდან თითქმის ხუთ თვეში, 15 ივნისს დააკავეს.

მას ბრალი წარედგინა სისხლის სამართლის კოდექსის 178-ე მუხლით, რაც გულისხმობს ძარცვას, სხვისი მოძრავი ნივთის აშკარა დაუფლებას, რამაც მნიშვნელოვანი ზიანი გამოიწვია, ჩადენილი ძალადობით.

საქმის მასალების მიხედვით, ბრალდებული 2018 წლის 2 თებერვალს, თბილისში, დავით აღმაშენებლის გამზირზე მდებარე შპს კაპიტალ ექსჩეინჯის კუთვნილ ვალუტის გადამცვლელ ჯიხურში შეიჭრა მოლარის სამუშაო ოთახში, ფიზიკური ძალის გამოყენებით წააქცია იგი იატაკზე, თანხის მისაკუთრების შემდეგ კი შემთხვევის ადგილიდან მიიმალა. მომხდარის შედეგად, შპს კაპიტალ ექსჩეინჯს ჯამში 4 686 ლარის ზიანი მიადგა.

პროკურატურის ცნობით, ბრალდებული 14 ივნისს, კაპიტალ ექსჩეინჯის დირექტორმა ამოიცნო ჯიხურის სამეთვალყურეო ვიდეოკამერების ჩანაწერებში, რომელიც ვალუტის გადამცვლელი პუნტქის მიმდებარედ ფეხით გადაადგილდებოდა და ამის შესახებ 112-ს შეატყობინა.

დ.ღ. ბრალდებულის სახით დააკავეს თბილისში, დიმიტრი უზნაძის ქუჩა #117-ის მიმდებარე ტერიტორიაზე.

2018 წლის 16 ივნისს, ბრალდებულ დ. ღ.-ს აღკვეთის ღონისძიების სახით პატიმრობა შეეფარდა. ამჟამად, თბილისის საქალაქო სასამართლოში, მიმდინარეობს საქმის არსებითი განხილვა.