გიორგი მარგველაშვილმა გადაწყვეტილება მიიღო. ის 2018 წლის საპრეზიდენტო არჩევნებს გამოეთიშება და კერძო სექტორს დაუბრუნდება.

პრეზიდენტის გადაწყვეტილებას ადეკვატურს უწოდებენ მმართველ გუნდში. ქართული ოცნების დეპუტატის მამუკა მდინარაძის შეფასებით, პრეზიდენტის უარმა წარმოედგინა უზენაესი სასამართლოს თავმჯდომარეობის კანდიდატი, მისი გადაწყვეტილება ნათელი გახადა.

"ეს არის ლოგიკური გადაწყვეტილება მისი მხრიდან, რადგან მან რეალურად შეაფასა თავისი შანსები და რეალურად გაზომა თავისი რეიტინგი", - განაცხადა მამუკა მდინარაძემ ჟურნალისტებთან საუბრისას.

ნაციონალური მოძრაობაში მიჩნევენ, რომ ქვეყნის მეოთხე პრეზიდენტი გამორჩეული არაფრით ყოფილა.

მმართველი გუნდისგან გასხვავებით, გიორგი მარგველაშვილის გადაწყვეტილებას ოპოზიცია აკრიტიკებს.

ნაციონალური მოძრაობის დეპუტატის ნიკა მელიას თქმით, მარგველაშვილმა ყველაზე მთავარი შანსი არ გამოიყენა.

"მარგველაშვილი წლების შემდეგ არ გამახსენდება, როგორც ამ ქვეყნის კეთილდღეობისთვის მებრძოლი ადამიანი. მან გაუშვა უდიდესი შესაძლებლობა მთელი ამ ხუთი წლის განმავლობაში", - განაცხადა ნიკა მელიამ.

ევროპული საქართველოს დეპუტატის, ელენე ხოშტარიას შეფასებით, მარგველაშვილმა პასუხისმგებლობა აიცილა.

"მაშინ, როცა არჩევნები საშუალებაა ებრძოლო პრობლემებს, რაც დაგროვდა ქვეყანაში, უარის თქმა ბრძოლაზე არის პასუხისმგებლობის მოცილება, სამწუხარო და გაუგებარი პოზიცია", - განაცხადა ელენე ხოშტარიამ.

მარგველაშვილის გადაწყვეტილება შეაფასეს არასაპარლამენტო ოპოზიციაშიც. "შენების მოძრაობის" ლიდერის დავით უსუფაშვილის თქმით, მარგველაშვილის გადაწყვეტილების შესახებ ერთი თვის წინ შეიტყო.

"სამწუხაროა... მგონია, რომ ამ ქვეყანას არ აქვს იმის ფუფუნება, რომ ყოფილი პრეზიდენტები და პრემიერები კერძო ცხოვრებას უბრუნდებოდნენ და არ ახმარდნენ თავიანთ გამოცდილებას ქვეყანას", - განაცხადა დავით უსუფაშვილმა.

საქართველოს პრეზიდენტმა, გიორგი მარგველაშვილმა 31 აგვისტოს, ლატვიის ყოფილ პრეზიდენტ, ვალდას ზატლერსისთან შეხვედრისას განაცხადა, რომ 2018 წლის საპრეზიდენტო არჩევნებში მონაწილეობას არ მიიღებს.

გიორგი მარგველაშვილი საქართველოს პრეზიდენტია 2013 წლის 27 ოქტომბრიდან. 2013 წლის მაისში იგი მმართველმა კოალიციამ ქართულმა ოცნებამ პრეზიდენტობის კანიდატად დაასახელა, რომელმაც ხმათა 62,18 პროცენტით გაიმარჯვა. მისი წარსული დაკავშირებულია პოლიტიკასთან, საზოგადოებრივ და საგანმანათლებლო საქმიანობასთან.

საქართველოში მომდევნო საპრეზიდენტო არჩევნები 2018 წლის 28 ოქტომბერს გაიმართება.