საქართველოს პრეზიდენტმა, გიორგი მარგველაშვილმა განაცხადა, რომ 2018 წლის საპრეზიდენტო არჩევნებში მონაწილეობას არ მიიღებს. ამის შესახებ მან რამდენიმე წუთის წინ, პრეზიდენტის სასახლეში გამართულ შეხვედრაზე თქვა.

გიორგი მარგველაშვილმა სიტყვით გამოსვლისას მადლობა გადაუხადა საკუთარ ოჯახს, რომელმაც მისივე თქმით ბოლო ხუთი წლის განმავლობაში რთული პერიოდი გაიარა.

"ძალიან ცოტა ქვეყანა მოიძებნება, სადაც მთელი პოლიტიკური ელიტა დაპირისპირებულია ერთ ადამიანთან და ყველა მანქანას ხმარობს იმისთვის, რომ მისი დისკრედიტაცია მოახდინოს, ყველა მანქანას ხმარობს იმისთვის, რომ შეარყიოს მისი მმართველობა და აი ამ რთულ მომენტებში, მე მთავარი ბარომეტრი მქონდა, თუ როგორ მხვდებოდა დუშეთში ხალხი და ამის განცდა მუდმივად მამყოფებდა იმის დარწმუნებაში, რომ მე სწორი გზით მივდივარ თქვენთან ერთად და ამ გზას თქვენთან ერთად გავაგრძელებ", - განაცხადა გიორგი მარგველაშვილმა.

გიორგი მარგველაშვილი საქართველოს პრეზიდენტია 2013 წლის 27 ოქტომბრიდან. 2013 წლის მაისში იგი მმართველმა კოალიციამ ქართულმა ოცნებამ პრეზიდენტობის კანიდადატად დაასახელა, რომელმაც ხმათა 62,18 პროცენტით გაიმარჯვა. მისი წარსული დაკავშირებულია პოლიტიკასთან, საზოგადოებრივ და საგანმანათლებლო საქმიანობასთან.

საქართველოში მომდევნო საპრეზიდენტო არჩევნები 2018 წლის 28 ოქტომბერს გაიმართება.