"დღეს მე აღარ ვარ საფრანგეთის მოქალაქე", - ამის შესახებ პრეზიდენტობის კანდიდატმა სალომე ზურაბიშვილმა პრესკონფერენციაზე განცხადა.

ზურაბიშვილის განმარტებით, საფრანგეთის პრემიერ-მინისტრმა და შინაგან საქმეთა მინისტრმა მოაწერეს ხელი შესაბამის განკარგულებას ხელი და 23 აგვისტოდან ის საფრანგეთის მოქალაქე აღარაა.

"ეს არ იყო ადვილი, მაგრამ ეს იყო აუცილებელი", - განაცხადა ზურაბიშვილმა.

საქართველოს კანონმდებლობით, საქართველოს პრეზიდენტი არ შეიძლება იყოს სხვა ქვეყნის მოქალაქე. სწორედ ამის გამო ზურაბიშვილს საფრანგეთის მოქალაქეობის დათმობა მოუწია.

სალომე ზურაბიშვილმა საპრეზიდენტო კანდიდატურა 6 აგვისტოს წამოაყენა. რამდენიმე დღით ადრე ქართული პოცნების წევრმა, ეკა ბესელიამ განაცხადა, რომ ზურაბიშვილი საფრანგეთის მოქალაქეობაზე ამბობდა უარს.

სალომე ზურაბიშვილი 1952 წლის 18 მარტს პარიზში, ქართული პოლიტიკური ემიგრაციის მოღვაწის, წლების მანძილზე საფრანგეთის ქართული სათვისტომოს თავმჯდომარის, ლევან ზურაბიშვილის ოჯახში დაიბადა. 2003-2004 წლებში იყო საფრანგეთის საგანგებო და სრულუფლებიანი ელჩი საქართველოში.

სალომე ზურაბიშვილის წარსული

სალომე ზურაბიშვილი მე-9 მოწვევის პარლამენტის დამოუკიდებელი დეპუტატია. 2016 წლის საპარლამენტო არჩევნებში იგი მთაწმინდის ოლქში, მაჟორიტარად იყრიდა კენჭს. მმართველმა პარტიამ ქართულმა ოცნებამმაშინაც არ დაასახელა კანდიდატი, ზურაბიშვილს დაუჭირა მხარი და გაიმარჯვა.

2010 წლიდან სალომე ზურაბიშვილი გაეროს უშიშროების საბჭოს სანქციების კომიტეტის ირანის ექსპერტთა ჯგუფის ხელმძღვანელი იყო. ის ერთიანი ნაციონალური მოძრაობის ხელისუფლებაში მოსვლის დროს, 2004-2005 წლებში საქართველოს საგარეო საქმეთა მინისტრის პოსტს იკავებდა.

იმდროინდელმა პრემიერ-მინისტრმა, ზურაბ ნოღაიდელმა ნაციონალური მოძრაობის დეპუტატების მოთხოვნის შედეგად იგი თანამდებობიდან გაათავისუფლა. მაშინდელმა პარლამენტის წევრებმა სალომე ზურაბიშვილი სამინისტროს არასწორად მართვაში, ელჩებთან კოორდინაციის ნაკლებობაში და სამინისტროში არსებულ ფავორიტიზმში დაადანაშაულეს. ბრალდებებს ზურაბიშვილი კატეგორიულად უარყოფდა.

გათავისუფლებიდან ცოტა ხანში სალომე ზურაბიშვილმა მმართველი პარტიის წარმომადგენლებს "ქაჯები" უწოდა, რომლებიც მის წინააღმდეგ "კარგად დაგეგმილი" კამპანიის უკან იდგნენ:

"დღეს მე მინდოდა შეხვედრა თქვენთან, რათა მსოფლიომ დაინახოს, რომ საქართველოში ქაჯები კი არ მოდიან, ქაჯები მიდიან".

დაამთავრა პარიზის პოლიტიკურ მეცნიერებათა ინსტიტუტი 1972 წელს, 1973 წელს კოლუმბიის (ნიუ-იორკი) უნივერსიტეტი, ხოლო 1981 წელს - პარიზის სახელმწიფო მართვის ეროვნული სკოლა.