ახლახან გამოქვეყნებული კვლევის შედეგად დადგინდა, რომ თინეიჯერებს, რომლებიც ალკოჰოლსა და სიგარეტს მოიხმარენ ნაკლებად ელასტიური არტერიები აქვთ, რაც მომავალში გულის შეტევისა და ინსულტის რისკს ზრდის.

არტერიების მიერ ელასტიურობის დაკარგვა ალკოჰოლისა და სიგარეტის მიერ ორგანიზმისთვის მიყენებული ზიანის ერთ-ერთი გამოვლინებაა. ცნობილია, რომ ასაკის მატებასთან ერთად სისხლძარღვები ნელ-ნელა უხეშდება, რაც საბოლოოდ გულ-სისხლძარღვთა სისტემის პრობლემებს იწვევს.

კვლევის ფარგლებში მეცნიერებმა 17 წლის ასაკში მყოფი 1 266 თინეიჯერი გამოჰკითხეს, ამასთან ერთად მკვლევარებმა მათი არტერიების ელასტიურობის დონეც განსაზღვრეს. შედეგად დადგინდა, რომ გამოკითხულთა 23.8 პროცენტი მწეველი იყო, ხოლო ექსპერიმენტში მონაწილეთა სამი მეოთხედი კი ალკოჰოლის მოხმარების დროს სამიდან ცხრა ჭიქამდე სასმელს სვამდა.

მეცნიერებმა აღმოაჩინეს, რომ თინეიჯერებს, რომლებიც 17 წლის ასაკში სიგარეტს ეწეოდნენ ბევრად უფრო გაუხეშებული არტერიები ჰქონდათ, ვიდრე არამწეველებს. კვლევის ფარგლებში ისიც დადგინდა, რომ რაც უფრო ადრეულ ასაკში იწყებდნენ ახალგაზრდები მოწევას, მით უფრო მეტად ზიანდებოდა მათი არტერიები, თუმცა მოწევის შეწყვეტისას სისხლძარღვების ელასტიურობის დონე ნორმალურ ნიშნულს მალევე უბრუნდებოდა.

ყველაზე მეტი დაზიანება კი სისხლძარღვებს ალკოჰოლისა და სიგარეტის ერთდროულად მოხმარების შემთხვევვაში ადგებოდა.

მეცნიერები კიდევ ერთხელ უსვამენ ხაზს იმ ფაქტს, რომ მოწევისა და ალკოჰოლის მოხმარებისთვის "უსაფრთხო" ასაკი არ არსებობს.

სულ რამდენიმე დღის წინ ასევე გამოქვეყნდა კვლევა, რომელშიც ნათქვამია, რომ ალკოჰოლის სულ მცირე რაოდენობით მიღებაც კი ჯანმრთელობისთვის საშიშია.