7 დღის წინ გვინეის ყურედან გაუჩინარებული გემი, რომელზეც 17 ქართველი მეზღვაური იმყოფება, კონგოს ტერიტორიულ წყლებში 23 აგვისტოს დააფიქსირეს. გემი ლომეს პორტისკენ მიემართება.

საგარეო საქმეთა სამინისტროს ინფორმაციით, მეზღვაურების სიცოცხლეს და ჯანმრთელობას საფრთხე არ ემუქრება დამათი მდგომარეობა დამაკმაყოფილებელია.

უწყების ცნობით, გაუჩინარებული მეზღვაურების პოვნის მიზნით, ამოქმედდა ყველა დარგობრივი და დიპლომატიური ბერკეტი, როგორც დასავლეთ აფრიკის რეგიონის ქვეყნები, ასევე საზღვაო და რეგიონული ორგანიზაციები.

"ინტენსიურ კონტაქტზე ვიმყოფებით გემთმფლობელ კომპანიასთან, რათა ეკიპაჟი უზრუნველყოფილი იქნას პირველადი საჭიროებებით (სასმელი წყალი, საკვები და სხვა). შექმნილი სიტუაციის პირველი წუთებიდანვე სააგენტო აქტიურ კავშირზეა გემის დროშის სახელმწიფოსთან - პანამა, ასევე ნიგერიაში მოქმედ საზღვაო უშიშროების ჯგუფებთან, რომლებთან უშუალო კოორდინაციითაც ხორციელდება ღონისძიებები მეზღვაურების უსაფრთხოების უზრუნველსაყოფად", - ნათქვამია გავრცელებულ განცხადებაში.

პანამის დროშის ქვეშ მცურავი გემი Pantelena, რომლის ბორტზეც 17 ქართველი იყო, 14 აგვისტოს შემდეგ კონტაქტი ვეღარ მყარდებოდა. გემით ნავთობი გადაჰქონდათ.