მას შემდეგ, რაც აშშ-ს პრეზიდენტმა, დონალდ ტრამპმა გერმანიის კანცლერი, ანგელა მერკელი რუსულ გაზზე დამოკიდებულების გამო გააკრიტიკა, ანგელა მერკელი აზერბაიჯანში ვიზიტის დროს კაასპიისპირეთიდან ევროპაში ბუნებრივი აირის მიწოდების გაზრდაზე იმსჯელებს. ამის შესახებ ინფორმაციას The Reuters-ს აქვეყნებს.

გამოცემის ცნობით, ვიზიტი ხაზს უსვამს მერკელის სურვილის იპოვოს გაზის მოწოდების სხვა წყაროები და ნაკლებად იყოს დამოკიდებული რუსეთზე.

გერმანიის მთავრობის ინფორმაციით, ისინი დაინტერესებულები არიან განავითარონ გაზის ტრანზიტის სამხრეთი კორიდორი.

"გაზის მიღება, არა რუსეთისგან არამედ სხვა რეგიონიდან ევროკავშირის დაშორების სტრატეგიის ერთ-ერთი ნაწილია", - წერს Reuters.

გერმანიის მთავრობის ცნობით, ბაქოში, სადაც მერკელი საქართველოში ვიზიტის დასრულების შემდეგ გაემგზავრება, ენერგეტიკასთან დაკავშირებულ საკითხებს განიხილავენ, მათ შორისაა ინფრასტრუქტურის განვითარება აზერბაიჯანიდან გაზის ტრანსპორტირების მიზნით ევროპაში თურქეთის გავლით.

გერმანია მიესალმება მიმდინარე თვეს რუსეთს, ირანს, ყაზახეთს, აზერბაიჯანსა და თურქმენეთს შორის კასპიის ზღვის სტატუსის შესახებ მიღწეულ შეთანხმებას, რაც შეიძლება იქცეს თურქმენეთიდან აზერბაიჯანის გავლით ბუნებრივი აირის მიწოდების პირველ ნაბიჯად და შესაბამისად, ხელი შეუწყოს ევროპის ბაზრის დივერსიფიკაციას, თუმცა მიიჩნევენ, რომ მსგავსი პროექტი სხვა სირთულეებთანაცაა დაკავშირებული.

გასულ კვირას რუსეთის პრეზიდენტმა, ვლადიმირ პუტინმა და ანგელა მერკელმა დახურულ შეხვედრაზე სირიასა და უკრაინაში მიმდინარე მოვლენები და ნორდსტრიმის ახალი გაზსადენის საკითხი განიხილეს.

ნორდსტრიმის ახალ გაზსადენთან დაკავშირებით გერმანიის კანცლერმა თქვა, რომ 2018 წელს ნორდსტრიმ 2-ის პროექტის დაწყების შემდეგაც უკრაინა არ უნდა გამოითიშოს გაზის ტრანზიტიდან.

Nord Stream 2 უკვე არსებულ Nord Stream-ის გაზსადენის პროექტს გააფართოვებს და ბალტიის ზღვის მეშვეობით ბუნებრივ აირს რუსეთიდან გერმანიას უკრაინაში გამავალი უკვე არსებული გაზსადენების გვერდის ავლით მიაწოდებს. ახალი პროექტი 9,5 მილიარდი ევრო ჯდება და ერთობლივად ორივე გაზსადენი წელიწადში 110 მილიარდი კუბური მეტრი ბუნებრივი აირის მიწოდებას შეძლებს, რაც ევროპაში ბუნებრივ აირზე მოთხოვნის მეოთხედია.

კავკასიური ვიზიტის ფარგლებში, ანგელა მერკელი საქართველოსა და სომხეთსაც ეწვევა.