სამართლიანი არჩევნებისა და დემოკრატიის საერთაშორისო საზოგადოება პრემიერ მინისტრს ამომრჩევლის მოსყიდვაში ადანაშაულებს. აჭარაში შუამთობის დღესასწაულზე ახალდაქორწინებულ წყვილს, იგორ აბულაძესა და ნათია დეკანაძეს აჭარის მთავრობის თავმჯდომარე ზურაბ პატარაძემ საჩუქრად ბეჭედი გადასცა.

სამართლიანი არჩევნების ცნობით, წწყვილს ოქროს ბეჭედი გიორგი კვირიკაშვილმაც აჩუქა, რასაც ხულოს გამგეობა არ ადასტურებს. თუმცა, ფოტოებზე საჩუქრის გადაცემის ორი ფაქტია ჩანს.

საარჩევნო კანონმდებლობის თანახმად, თუ პარტიის წარმომადგენელის მიერ მოქალაქისთვის გადაცემული საჩუქრის ფასი ას ლარს არ აღემატება, ადმინისტრაციული სამართალდარღვევის საფუძველზე ის ნივთის ათმაგი საფასურით ჯარიმდება. ხოლო, იმ შემთხვევაში, თუ ნივთის ფასი ას ლარს აღემატება, ფაქტი შესაძლოა სისხლის სამართლის დანაშაულად ჩაითვალოს.

სამართლიანი არჩევნებისა და დემოკრატიის საერთაშორისო საზოგადოება პროკურატურას რეაგირებისაკენ მოუწოდებს. ორგანიზაცია აღნიშნავს, რომ მსგავსი შემთხვევა პირველად არ ხდება. 2013 წლის 11 აგვისტოს, მაშინდელმა პრემიერმა, ბიძინა ივანიშვილმა ახალდაქორწინებულ წყვილს ასევე აჩუქა ბეჭედი.