თავდაცვის მინისტრმა ლევან იზორიამ დღეს, მუხათგვერდის ძმათა სასაფლაოზე თავისი წინამორბედის, თინა ხიდაშელის მიერ თავდაცვის სამინისტროში სამხედრო გაწვევის შეჩერების გადაწყვეტილებაზე ისაუბრა: "მიმდინარეობს ამ საკითხის შესწავლა და გარკვეული დროა გადაწყვეტილების მისაღებად საჭირო".

თავის მხრივ, თინა ხიდაშელმა კიდევ ერთხელ განმარტა, რატომ გამოსცა ბრძანება, რომლის მიხედვითაც თავდაცვის სამინისტრო არ გაიწვევს ახალგაზრდებს სავალდებულო სამხედრო სამსახურში: "არ შეიძლება ჩვენ ქვეყანაში გვყავდეს უფასო მუშახელი, 18-19 წლის ახალგაზრდებს, ფაქტობრივად, ვიყენებდეთ მონური შრომისთვის. ჩემთვის ეს ძალიან პრინციპული გადაწყვეტილება იყო და მე თავდაცვის სამინისტროს ისე ვერ დავტოვებდი, რომ იქ სადაც შემეძლო ამ გადაწყვეტილების მიღება, არ დამესრულებინა".

ხიდაშელის ბრძანება ეხება მხოლოდ და მხოლოდ თავდაცვის სამინისტროს, ხოლო სხვა ძალოვანი უწყებები, რომლებიც ახორციელებენ წვევამდელთა გაწვევას, აღნიშნულს ჩვეულებრივ აგრძელებენ.