სმარტფონზე ლოკაციის ისტორიის შენახვის ფუნქციის გამორთვის შემდეგ თქვენ გგონიათ, რომ გიგანტი ინტერნეტკომპანიების თვალთვალისგან თავისუფალნი ხართ, თუმცა ეს ასე არ არის.

როდესაც თქვენს სმარტფონზე ეს ფუნქცია გამორთულია, გუგლი თქვენს ადგილმდებარეობას თვალყურს მაინც ადევნებს. ეს მაშინ ხდება, როდესაც ჩვენ გუგლის საძიებო სისტემას, ამინდის პროგნოზს, მის რუკას ან რაიმე სხვა აპლიკაციას ვიყენებთ.

Associated Press-ის გამოქვეყნებულ მოხსენებაში ნათქვამია, რომ ლოკაციის ისტორიის ფუნქცია ერთ-ერთი სისტემაა, რომელიც გუგლს თქვენი ადგილმდებარეობის დადეგნაში ეხმარება, კომპანია კი მას ძირითადად რეკლამების მომხმარებელზე მოსარგებად იყენებს.

ამ ფუნქციის გამორთვის შემდეგ გუგლი ადგილმდებარეობის ავტომატურ ჩაწერას წყვეტს, თუმცა ის გვაძლევს გაფრთხილებას, რომ "გუგლის სხვა პროდუქტების გამოყენებისას თქვენს ადგილმდებარეობაზე გარკვეული ინფორმაცია შეიძლება მაინც შეინახოს."

თუ გნებავთ, რომ გუგლის ადგილმდებარეობის დადგენის სერვისებისგან თავისუფალი იყოთ, პარამეტრებიდან ფუნქცია "ვებსა და აპებში აქტივობა" უნდა გამორთოთ.

თუ თქვენ ანდროიდის სისტემის სმარტფონი გაქვთ, ასე უნდა მოიქცეთ:

  • გახსენით პარამეტრები
  • დააჭირეთ Google-ს, შემდეგ კი Google ანგარიშს
  • დააჭირეთ მენიუს და აირჩიეთ მონაცემები და პერსონალიზება
  • მოძებნეთ ფუნქცია ვებსა და აპებში აქტივობა და გამორთეთ ის

ლოკაციის ისტორიის გამორთვა შემდეგნაირად შეგიძლიათ:

  • გახსენით პარამეტრები
  • დააჭირეთ ლოკაციას
  • გახსენით მდებარეობის ისტორიის გამოყენება და გამორთეთ ის

აიფონის ან აიპედის შემთხვევაში გამოიყენეთ შემდეგი ინსტრუქცია:

  • გახსენით ეს ლინკი, რომელიც პირდაპირ გუგლის ანგარიშის გვერდზე გადაგიყვანთ
  • გამორთეთ ვებსა და აპებში აქტივობა
  • მდებარეობის ისტორიის ფუნქციის გამოსართველი ღილაკიც ამავე გვერდზე დაგხვდებათ

ეს პირველი შემთხვევა არ არის, როდესაც გუგლი ადგილმდებარეობის ინფორმაციის მომხმარებლის სურვილის მიუხედავად მაინც ინახავს. წინა წლის ნოემბერში გამოაშკარავდა, რომ კომპანია ადგილმდებარეობის ინფორმაციას მაშინაც აგროვებდა, როდესაც თქვენ ლოკაცია გამორთული გქონდათ. ამას ის სატელეფონო ქსელის ანძების მეშვეობით ახერხებდა. ამჯერად იმავე მიზნის მისაღწევად გუგლმა არა სატელეფონო ანძები, არამედ თავისი ვებსერვისები გამოიყენა.

ამავე თემაზე: