ალბათ, აქამდეც გსმენიათ, რომ ხილისა და ბოსტნეულის გარეცხვა არასასურველი ბაქტერიებისა და პათოგენებისგან თავდასაცავად აუცილებელია, მაგრამ ასევე გვსმენია ისიც, რომ გაციებას თავიდან თბილად ჩაცმა აგვარიდებს, თითების ტკაცუნი კი ართრიტს იწვევს. ამ ბოლო ორი განცხადებიდან მართალი არც ერთი არაა.

ალბათ ყველა თქვენგანი დაეჭვებულა, ნამდვილად საჭიროა თუ არა მათი გარეცხვა. ისინი ხომ ბუნებაში, ხეებზე იზრდებიან, როგორ შეიძლება უწყინარი ვაშლი სასიკვდილო დაავადებების წყარო იყოს?

სანამ საკითხს უფრო დეტალებში განვიხილავდეთ, გვითხარით, როგორია თქვენი პირადი პოზიცია ამ საკითხზე.

როგორც აღმოჩნდა, კი, ხილისა და ბოსტნეულის გარეცხვა აუცილებელია

ამერიკის შეერთებული შტატების დაავადებების კონტროლისა და პრევენციის ცენტრი გვირჩევს, რომ საკვებით გავრცელებადი დაავადებებისგან თავის ასარიდებლად პროდუქტები აუცილებლად გავრეცხოთ. წყლის გადავლებით მათ მიწის, ქვების, მწერებისა და ჭუჭყისგან ვასუფთავებთ. მაგალითად, ავიღოთ მწვანე ხახვი. ის მოგრძო ფორმისაა და მიწაშია ჩარჭობილი, დაკრეფვისას კი შესაძლოა მიწის ნაწილი ამოჰყვეს. თუ ეს მიწა ბაქტერიების თანხლებით ჩვენს ორგანიზმში მოხვდება, შეიძლება ავად გავხდეთ.

ეს ერთ-ერთი მაგალითია იმისა, თუ როგორ შეიძლება საზიანო ბაქტერია გაურეცხავი საკვებიდან თქვენს ორგანიზმში მოხვდეს. გარდა ამისა, იმაზეც დაფიქრდით, თუ რა გზას გადის საკვები დაკრეფვიდან თქვენამდე. ფერმაში ის სატვირთო მანქანებში იტვირთება, შემდეგ ის მაღაზიაში იგზავნება, სადაც კონსულტანტები დახლზე აწყობენ, შემდეგ ის რამდენიმე საათი, ან დღე მაღაზიაში დევს, სადაც მას უამრავი ხელი ხვდება. დიდი შანსია, რომ ამ პროცესში მათ ვინმემ დაუბანელი ხელი მოკიდოს და მასზე საზიანო ბაქტერიები გადაიტანოს, რომელიც ამ ჯაჭვის ბოლოს ჩვენ მოგვწამლავს.

საკვების გარეცხვის მიუხედავად, თქვენ შეიძლება მაინც მოიწამლოთ

ხილისა და ბოსტნეულის გარეცხვა ბაქტერიებისგან სრულად ვერ დაგიცავთ.

"ხილისა და ბოსტნეულის ცივი წყლით რეცხვა მათ ზედაპირზე არსებული ბაქტერიების მხოლოდ ნაწილს აშორებს", - ამბობს შეერთებული შტატების აგრიკულტურის დეპარტამენტის წარმომადგენელი ბრენდან ნიემირა.

"სამწუხაროდ, ცივი წყლით რეცხვა ბაქტერიებს სრულად ვერ აშორებს. მათი მოშორება ერთიორად რთულია თუ ისინი საკვებზე მჭიდროდ არიან მიკრულნი, ან თუ ისინი მასზე ბიოფირფიტის სახით ცხოვრობენ"

თუ თქვენი სალათის ფურცელი ეშერიხია კოლით არის დაბინძურებული, მისი რეცხვით ბევრს ვერაფერს შეცვლით. 2017 წელს გამოქვეყნებულ კვლევაში, მეცნიერებმა E.coli-თ დაბინძურებული სალათის ფურცლის რეცხვა სცადეს, რათა პათოგენი მოეშორებინათ. მიუხედავად იმისა, რომ რეცხვამ ეშერიხია კოლის რაოდენობა შეამცირა, სალათზე არსებული ბაქტერიის რაოდენობა დასაშვებს მაინც საკმაოდ აღემატებოდა.

უფრო მეტიც, თუ ბაქტერია პატარა ჭრილის, ან დაჟეჟილობის მეშვეობით ხილისა და ბოსტნეულის კანქვეშ შეაღწევს, თქვენ მისი გარედან რეცხვით ვერაფერს მიაღწევთ. ამიტომ, დაჭყლეტილ ხილს და ბოსტნეულს უნდა მოერიდოთ.

დასკვნა?

დედათქვენი მართალია. მიუხედავად იმისა, რომ ხილისა და ბოსტნეულის გარეცხვა თქვენ ყველა შესაძლო დაავადებისგან ვერ დაგიცავთ, ის საზიანო ბაქტერიების შესამცირებლად კარგი საშუალებაა. თუ გავითვალისწინებთ, რომ ხილის გარეცხვა დიდ დროსა და ძალისხმევას არ მოითხოვს, არ არსებობს მიზეზი, რომლის გამოც ამაზე უარი უნდა თქვათ.