Reuters-ის ცნობით, ამერიკის შეერთებული შტატები აცხადებს, რომ რუსეთის მთავრობამ ქიმიური იარაღი გამოიყენა, ყოფილი რუსი აგენტის, სერგეი სკრიპალისა და მისი შვილის მოსაწამლად, რის გამოც მოსკოვისთვის სანქციების დაწესებას გეგმავს.

"აშშ აცხადებს, რომ რუსეთის ფედერაციამ გამოიყენა ქიმიური ან ბიოლოგიური იარაღი, რითაც დაარღვია საერთაშორისო სამართლის ნორმები ან გამოიყენა ლეტალური ან ბიოლოგიური იარაღი საკუთარი მოქალაქეების წინააღმდეგ", - ნათქვამია სახელმწიფო დეპარტამენტის პრესსპიკერის, ჰიტერ ნაურტის 8 აგვისტოს განცხადებაში.

მისივე თქმით, რუსეთის წინააღმდეგ დაწესებული სანქციები ძალაში შევა 22 აგვისტოდან.

სერგეი სკრიპალი შვილთან, იულიასთან ერთად ბრიტანეთის ქალაქ სოლსბერიში 4 მარტს მოწამლეს. ისინი უგონოდ საზოგადოებრივი თავშეყრის ადგილზე მდგარ სკამზე იპოვეს. ბრიტანეთმა მოწამლვაში რუსეთი დაადანაშაულა და საწამლავად ნოვიჩოკი დაასახელა. აღნიშნული საშუალება სასიკვდილო ნივთიერებაა, რომელიც საბჭოთა კავშირმა 1970-80 წლებში გამოუშვა. რუსეთმა საქმეში ყოველგვარი მონაწილეობა უარყო.

გაიგეთ მეტი: სერგეი სკრიპალის საქმე