პანამის დოკუმენტებით ირკვევა, რომ ბრიტანეთის პრემიერ-მინისტრის, დევიდ კემერონის მამა, იან კემერონი ოფშორულ ზონაში დარეგისტრირებულ ფონდს ფლობს, რომელიც ათეულობით წლებია ბრიტანეთში მოქმედებს და ქვეყნის ბიუჯეტში ერთი ფუნტიც არ შეუტანია.

ბლეიმორ ჰოლდინგ ინქორფორეითედი ბაჰამაზე 1982 წელს დარეგისტრირდა და მდიდარი ბრიტანელი ოჯახების ფულად სახსრებს განაგებდა. კომპანიას პრემიერი კემერონის მამა გარდაცვალებამდე ფლობდა და ხელმძღვანელობდა.

ბრიტანული გამოცემა გარდიანის ცნობით, დადასტურდა, რომ არსებობის 30 წლის მანძილზე ფონდს გადასახადის სახით ერთი პენიც არ გადაუხდია ქვეყნის ბიუჯეტის სასარგებლოდ.

ჟურნალისტებისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ე.წ. საგადასახადო სამოთხეებს (ოფშორულ ზონებს) ფულის გასათეთრებლად და გადასახადებისგან თავის ასარიდებლად. გამოჟონილი დოკუმენტების რაოდენობა კოლოსალურია.

იურიდიული ფირმის შიდა ბაზიდან 2.6 ტერაბაიტის მოცულობის 11.5 მილიონი დოკუმენტია ამოღებული, რაც ბევრად მეტია, ვიდრე 2010 წლის ვიკილიქსის ან 2013 წლის სნოუდენის დოკუმენტები.