ციანიდის საქმეზე მსჯავრდებული დეკანოზი გიორგი მამალაძე ამბობს, რომ აპირებს პრეზიდენტ გიორგი მარგველაშვილს წერილი მიწეროს, სადაც იმ გარემოებების ახსნის, რის მსხვერპლადაც მიიჩნევს თავს. ამის შესახებ მან რუსთავი 2-თან სატელეფონო საუბრისას აღნიშნა.

ჟურნალისტის კითხვაზე - რამდენად აქვს მას პრეზიდენტის იმედი - დეკანოზმა ასე უპასუხა:

"ბატონ პრეზიდენტს შეუძლია და აქვს უნიკალური ბერკეტი და საშუალება, უფრო დეტალურად ჩასწვდეს, საზოგადოებაზე უფრო მეტად, უფრო ღრმად და ძირფესვიანად შეისწავლოს ეს საკითხი და მიიღოს ის გადაწყევტილება, რომელიც ნათელს მოჰფენს ყველაფერს, მაგრამ ეს უკვე პრეზიდენტის გადაწყევტილებაა.

რამდენად გაუძლებს პრეზიდენტი იმ ზეწოლას, რომელსაც ვერ გაუძლო გვენეტაძემ [უზენაესი სასამართლოს ყოფილი თავმჯდომარე], ბუგიანაშვილმა და სხვა მოსამართლეებმა, ეს უკვე პრეზიდენტის პიროვნულობაზეა დამოკიდებული", - აღნიშნა დეკანოზმა.

პრეზიდენტმა რამდენიმე დღის წინ განაცხადა, რომ მამალაძის შეწყალების საკითხს "შემდეგ განიხილავდა".

მამალაძე 2017 წლის 10 თებერვალს თბილისის საერთაშორისო აეროპორტში დააკავეს. მას პატრიარქის მდივან-რეფერენტის, შორენა თეთრუაშვილის მკვლელობის მომზადება ედება ბრალად. დეკანოზი გიორგი მამალაძე სასამართლომ დამნაშავედ სცნო და მას შორენა თეთრუაშვილის განზრახ მკვლელობის მომზადებისა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა. 2018 წლის 13 თებერვალს თბილისის სააპელაციო სასამართლომ დეკანოზ გიორგი მამალაძის მიმართ გამოტანილი განაჩენი ძალაში დატოვა, უზენაესმა სასამართლომ კი დაუშვებლად სცნო.