ლეიბორიტული პარტიის საპრეზიდენტო კანდიდატი, შალვა ნათელაშვილი მარიხუანის მოხმარების ლეგალიზაციას საკონსტიტუციო სასამართლოს "ისტორიულ დანაშაულს" უწოდებს. დღეს, 31 ივლისს გამართულ ბრიფინგზე, ნათელაშვილმა განცხადა, რომ მისი გაპრეზიდენტების შემთხვევაში ნარკოპოლიტიკა გამკაცრდება და საკონსტიტუციო სასამართლო გაუქმდება:

"აიკრძალება ნარკოტიკების პროპაგანდა და დამნაშავე საკონსტიტუციო სასამართლო დაიშლება. ის გაუქმდება და შეუერთდება საერთო იურისდიქციის სასამართლოებს, როგორც ეს ევროპის დემოკრატიულ ქვეყნებშია".

ნათელაშვილის თქმითვე, საკონსტიტუციო სასამართლოს მიერ მარიხუანის მოხმარების ლეგალიზება დაუშვებელია, რადგან სწორედ მისგან იწყება უფრო მძიმე ნარკოტიკების მიღება.

"მოგეხსენებათ, მარიხუანა პირველი, მოსამზადებელი ჯგუფია უფრო სერიოზულ ნარკოტიკებზე გადასასვლელად", - აღნიშნა ნათელაშვილმა.

ლეიბორისტული პარტიის ლიდერი სასამართლოს გადაწყვეტილებას ქართული ოცნების თავმჯდმარის შვილის, ბერა ივანიშვილის შემოქმედებას უკავშირებს და ამბობს, რომ დღეს საქართველო მისი რეპით იმართება.

გუშინ, 30 ივლისს საკონსტიტუციო სასამართლომ პარტია გირჩის წევრების სარჩელი დააკმაყოფილა, რითაც მარიხუანის მოხმარებისთვის ადმინისტრაციული სასჯელის გააუქმა. სასამართლოს ამ შემთხვევაში არ უმსჯელია მარიხუანის მოპოვების გზებზე. შესაბამისად, შეძენა-შენახვა-კულტივაცია და რეალიზაცია კვლავ დასჯადია.