შინაგან საქმეთა სამინისტროს განცხადების მიხედვით, დაცვის პოლიციის თანამშრომელი შსს-ს სიტყვიერი და ფიზიკური შეურაცხყოფის მიყენებაში ადანაშაულებს. პოლიციელის ვერსიით, უწყების თანამშრომლებმა მასზე მაშინ იძალადეს, როცა ცოლზე მუქარის ბრალდებასთან დაკავშირებით გენერალურ ინსპექციაში იყო დაბარებული.

შსს-ს ინფორმაციით, დაცვის პოლიციის თანამშრომელმა 21 ივლისს მეუღლეს სამსახურში მიაკითხა და სიცოცხლის მოსპობით დაემუქრა, რის შემდეგაც უწყებამ მუქარის ფაქტზე გამოძიება დაიწყო სისხლის სამართლის კოდექსის 11 პრიმა 151-ე მუხლით და შემაკავებელი ორდერი გამოსცა.

უწყების ვერსიით, აღნიშნულ საქმეზე პოლიციელი გამოკითხვაზე გენერალურ ინსპექციაში დაიაბრეს, სადაც ის აგრესიულად მოქცა, საკუთარი ხელით დაიხია სამხრეები და მოითხოვა შენობის დატოვება.

შსს-ს ცნობით, პოლიციელის ადვოკატის განცხადება გენერალური ინსპექციის მხრიდან მისთვის შესაძლო სიტყვიერი და ფიზიკური შეურაცხყოფის მიყენების შესახებ პროკურატურაში გაიგზავნა. სამინისტრო თანამშრომლის მიმართ შეურაცხყოფის მიყენებას უარყოფს.