საქართველოს საგანგებო სიტუაციების მართვის სამსახური საბერძნეთს დახმარებას სთავაზობს. ამის შესახებ საგანგებო სიტუაციების მართვის სამსახურის უფროსის მოვალეობის შემსრულებელმა შალვა ხუციშვილმა საბერძნეთის სამოქალაქო უსაფრთხოების მდივანს კაპაკისის ოფიციალური წერილით მიმართა.

"ამ მძიმე წუთებში, ჩვენი ფიქრები არის ბერძენ ხალხთან, მსხვერპლთა ოჯახებთან და ყველა იმ ადამიანთან, რომელიც დაზარალდა ტრაგიკული შემთხვევის შედეგად. მსხვერპლთა ოჯახებსა და მეგობრებს ვუსურვებ გამძლეობასა და მორალურ სიმტკიცეს. ეჭვგარეშეა, რომ საბერძნეთი მამაცურად გადალახავს ძნელბედობის ჟამს. გამოვხატავთ მზადყოფნას, რომ თქვენი მოთხოვნის შესაბამისად, აღმოგიჩინოთ დახმარება ჩვენი შესაძლებლობების ფარგლებში. ძვირფასო გენერალურო მდივანო, გთხოვთ, მიიღეთ ჩემი თქვენდამი ღრმა პატივისცემა", - ნათქვამია განცხადებაში.

საბერძნეთში, ათენთან ტყის ხანძრებს ამ დრომდე, სულ მცირე, სამოცი ადამიანი ემსხვერპლა. საბერძნეთის პრემიერ-მინისტრმა, ალექსის ციპრასმა ქვეყანაში 3-დღიანი გლოვა გამოაცხადა.

ამავე თემაზე: