სახელმწიფო გადატრიალებისა და ფეტულა გიულენთან შესაძლო კავშირის ბრალდებით, თურქეთში ფეხბურთის 94 მსაჯი გაათავისუფლეს. ინფორმაციას Yahoo News თურქეთის ფეხბურთის ფედერაციაზე დაყრდნობით ავრცელებს.

გათავისუფლებულ მსაჯებს შორის არიან როგორც რეგიონული, ისე ეროვნულ ნაკრებში მომუშავე პირები, ასევე მსაჯების დამხმარეები, რეგიონული სამსაჯო კომიტეტის წევრები, ეროვნული და რეგიონული დამკვირვებლები.

ფეხბურთის ფედერაციაში ადგილობრივი ინსპექცია იმისთვის, რომ გადატრიალებასთან დაკავშირებული პირები აღმოეჩინა გასულ შაბათ-კვირას შევიდა. ერთ-ერთმა თურქმა ფეხბურთელმა, მარიო გომესმა კი, რომელიც კლუბ ბაშიკთაშში თამაშობდა განაცხადა, რომ კლუბს არსებული პოლიტიკური სიტუაციაციის გამო ტოვებდა.

გარდა ამისა, თურქეთის ტელევიზიით ასევე გავიდა კადრები, რომელშიც ჩანს, რომ გადატრიალების დღეს სტამბოლში, კლუბ ბაშიკტაშის სტადიონზე ამბოხებულების ვერტმფრენი დაჯდა.

თუმცა, როგორც თურქეთის ფეხბურთის ფედერაცია აცხადებს, სუპერლიგის, საერთაშორისო და სხვა ჩანიშნული საფეხბურთო მატჩები აუცილებლად გაიმართება.

2 აგვისტოს თურქეთის წამყვანი სამხედრო ჰოსპიტალის - გიულხანეს 50 თანამშრომელიც დააკავეს. გარდა ამისა, დაკავების ორდერია გაცემული კიდევ 50 თანამშრომელზე.

ერდოღანი აგრძელებს ე.წ. წმენდას და განმარტავს, რომ თუ ქვეყნის სამხედრო ნაწილების რეკონსტრუქცია არ მოხდება, გიულენის მხარდამჭერები ისევ ეცდებიან ამბოხის დაწყებას.

ბოლო მონაცემებით:

  • გარდაცვლილია 246 ადამიანი.
  • დაშავებულია 1400-ზე მეტი მოქალაქე.
  • დახურულია 130 მედია საშუალება.
  • გაცემულია 42 ჟურნალისტის დაკავების ორდერი.
  • სამსახურიდან გაშვებულია 66 ათასამდე საჯარო მოხელე.
  • ქვეყანაში სამთვიანი საგანგებო მდგომარეობაა გამოცხადებული.

15 ივლისს თურქეთში ხელისუფლების დამხობის მიზნით ქვეყნის რამდენიმე ლოკაციაზე შეიარაღებული დაჯგუფების თავდასხმას 300-მდე ადამიანის სიცოცხლე ემსხვერპლა, აჯანყებასთან კავშირის ბრალდებით თანამდებობიდან გადააყენეს და დააკავეს ათასობით მოსამართლე, მაღალი თანამდებობაზე მყოფი სამხედროები, პოლიციელები და სამოქალაქო პირები.

თურქეთში მომხდარი ამბოხის გამომწვევი მიზეზების, მისი ორგანიზატორებისა და მომხდარის შესახებ დეტალურ ინფორმაციას შეგიძლიათ გაეცნოთ აქ: