Reuters-ის ცნობით, თურქეთი ევროკავშირთან უვიზო რეჟიმის დაწესებას 2016 წლის ოქტომბრამდე ითხოვს, წინააღმდეგ შემთხვევაში ანკარა უარს აცხადებს ორ მხარეს შორის მიგრანტებთან დაკავშირებული შეთანხმების შესრულებაზე. ამის შესახებ ქვეყნის საგარეო საქმეთა მინისტრმა, მევლუთ ჩავუშოღლუმ განაცხადა.

მისი თქმით, თურქეთის ხელისუფლება ევროკავშირისგან სავიზო რეჟიმის გაუქმებისთვის კონკრეტულ თარიღს ელოდება.

მარტში ორ მხარეს შორის შეთანხმება შედგა, რომლის თანახმადაც ევროკავშირსა და თურქეთს ერთად უნდა ებრძოლათ მიგრანტთა კრიზისის წინააღმდეგ. გეგმის მიხედვით, თურქეთში ზღვიდან მოხვედრილი ყველა არალეგალი მიგრანტი, უკან უნდა გაებრუნებინათ. თითოეული ასეთი არალეგალის გაბრუნების სანაცვლოდ კი, ევროკავშირმა აიღო ვალდებულება ერთი სირიელი ლტოლვილი მიეღო. ამასთან, ლტოლვილების შესანახად ევროკავშირმა თურქეთს 6 მილიარდი ევრო გამოუყო.

თურქეთში მომხდარი სახელმწიფო გადატრიალების მცდელობის შემდეგ ქვეყანამ უარი განაცხადა ადამიანის უფლებების ევროპული კონვენციის მოქმედებაზე. თურქეთის პრეზიდენტმა, რეჯეპ ტაიპ ერდოღანმა კი განმარტა, რომ ამბოხების ორგანიზატორების დასასჯელად შესაძლოა სიკვდილით დასჯა ისევ შემოიღონ. სწორედ ამის შემდეგ გადაწყვიტა ევროკავშირმა, რომ თურქეთს უვიზო მიმოსვლის საშუალებას წელს არ მისცემდა.

გაიგეთ მეტი: