ადვოკატი დავით გირგვლიანი, რომელმაც სმიტების ოჯახის მკვლელობაში ბრალდებულის დაცვაზე უარი ექსპერტიზის დასკვნის გავრცელების შემდეგ განაცხადა, დამატებით განმარტებებს აკეთებს.

დავით გირგვლიანმა პირველ არხს განუცხადა, რომ ვერ დაეთანხმება აზრს, "თითქოს სმიტების ოჯახში ბრალდებულის დაცვაზე უარი მხოლოდ ექსპერტიზის დასკვნებიდან გამომდინარე თქვა". ამის მიუხედავად ადვოკატი არ უარყოფს, რომ ექსპერტიზის დასკვნა საქმეზე ჩამოშორების ერთ-ერთი მიზეზი გახდა.

"ცალსახად რომ ვთქვა, ექსპერტიზის დასკვნები არავითარ კავშირში არ არის ჩემს გადაწყვეტილებასთან, ამას ვერ ვიტყვი, თუმცა ბევრი რამის ანალიზის საფუძველზე მივიღე ეს გადაწყვეტილება", - განაცხადა ადვოკატმა.

მისი თქმით, გამოძიების შემდგომ ეტაპებზე წარმოიშვა გარკვეული ინტერესთა კონფლიქტი ადვოკატსა და ბრალდებულს შორის.

"ნამდვილად ვერ დავეთანხმები იმ ადამიანების აზრს, თითქოს ეს გადაწყვეტილება მხოლოდ რაღაც ექსპერტიზის დასკვნებიდან გამომდინარე მივიღე. გამოძიების შემდგომ ეტაპებზე წარმოიშვა გარკვეული ინტერესთა კონფლიქტი ჩემსა და ჩემი დაცვის ქვეშ მყოფს შორის იმ მიმართულებით, რომ სხვადასხვაგვარი სტრატეგიის განვითარებამ წამოიწია წინ. მე დაცვის სტრატეგიის შემუშავებას სხვა მიმართულებით ვფიქრობდი და ამ მიმართულებით თითქოს არათავსებადი იყო ჩვენი პოზიციები", – აცხადებს დავით გირგვლიანი.

ადვოკატის თქმით, განცხადებები, რომელიც უკავშირდება სმიტების ოჯახის უცხოელი პირების მიერ მოკვლის ვერსიას და ბრალდებულის დაშინებას, მისი განვითარებული არაა და ბრალდებული კობაური ამ განცხადებებს მის საქმეში ჩართვამდეც აკეთებდა.

"თავიდანვე ჩემი მთავარი მიზანი ის იყო, რომ ჭეშმარიტება დადგენილიყო ამ საქმეში და გადაჭრით არსად არ მითქვამს, რომ ეს ადამიანი ცალსახად დამნაშავეა თუ უდანაშაულო. არასოდეს არ დავარღვევ ადამიანის უდანაშაულობის პრეზუმციას, მიუხედავად იმისა, რომ საზოგადოების რაღაც ნაწილი ამას მოითხოვს", - განაცხადა ადვოკატმა.

ტელეკომპანიები რუსთავი 2 და იმედი რამდენიმე კვირის წინ ხადას ხეობაში მოკლული სმიტების ოჯახის წევრებზე ჩატარებული ექსპერტიზის დასკვნებს ასაჯაროებენ. ამ დასკვნის მიხედვით, ლორა სმითის სხეულში აღმოჩენილია ამ საქმეზე დაკავებულის დნმ, შვილი კი თოფის მიბჯენით მოკლეს.

13 ივლისს ცნობილი გახდა, რომ შინაგან საქმეთა სამინისტრო სმიტების საქმის გამძიების დროს ძალადობის კუთხითაც მუშაობდა. მაშინ უწყებაში ამბობდნენ, რომ ექსპერტიზის დასკვნას ელოდებოდნენ.

საქმის დეტალები

შინაგან საქმეთა სამინისტროს ინფორმაციით, 6 ივლისს, 112-ში შევიდა შეტყობინება საქართველოსა და ამერიკის ორმაგი მოქალაქეობის მქონე 2 პირის და მათი 4 წლის შვილის დაკარგვის შესახებ. შეტყობინების ინიციატორის თქმით, დაკარგულები დუშეთის რაიონში, ხადას ხეობაში იმყოფებოდნენ და მათთან დაკავშირება ვერ ხერხდებოდა.

პოლიციელებმა სოფელ წკერეში დაკარგული ტურისტების კუთვნილი ავტომანქანა და პირადი ნივთები აღმოაჩინეს. მაშველებმა დაკარგული ტურისტი ქალი, ავტომანქანიდან, დაახლოებით, 3 კილომეტრში, ხევში, ჩანჩქერის ძირში გარდაცვლილი 6 ივლისს იპოვეს. რაიან სმიტის ცხედარი 7 ივლისს, ხევში მდებარე ჩანჩქერის მიმდებარე ტერიტორიაზე ნახეს. იქვე ახლოს ნახეს მათი კუთვნილი ნივთებიც, ჩანთაც და ფულიც. რამდენიმე საათის შემდეგ ნახეს მათი 4 წლის შვილის გვამიც.

რაიან სმიტი მეუღლესთან ერთად დაახლოებით 7 წელია, რაც საქართველოში, მარნეულში ცხოვრობდა და აზერბაიჯანული ხალიჩების ბიზნესით იყო დაკავებული.

ამ საქმეზე ბრალდებულ მალხაზ კობაურს სასამართლომ აღკვეთის ღონისძიებად პატიმრობა შეუფარდა. დაკავებული დანაშაულის ჩადენას არ აღიარებს.