საქართველოს შინაგან საქმეთა სამინისტროს სმიტების ოჯახის მკვლელობის საქმეში სექსუალური ძალადობის ვერსიაზეც მუშაობს. ამის შესახებ ინფორმაცია On.ge-ს შსს-ს პრესსამსახურში დაუდასტურეს.

უწყებაში აცხადებენ, რომ გამოძიება ექსპერტიზის პასუხებს ელოდება.

გამოძიებაში სექსუალური ძალადობის ვერსიაზე პირველად ინფორმაცია რუსთავი 2-მა გაავრცელა. რუსთავი 2-ის ცნობით, ხადას ხეობაში მომხდარი მკვლელობის საქმეზე ექსპერტიზის წინასწარი დასკვნა უკვე მომზადებულია, სადაც აღნიშნულია, რომ მსხვერპლს სექსუალური ძალადობის კვალი აღენიშნება.

ამერიკის მოქალაქეების, სმიტების მკვლელობაში ბრალდებულს, მალხაზ კობაურს სასამართლომ აღმკვეთი ღონისძიების სახით პატიმრობა შეუფარდა. ბრალდებული დანაშაულს არ აღიარებს და აცხადებს, რომ სმიტების ოჯახი ორმა უცხო პირმა მოკლა.

საქმის დეტალები

შინაგან სამეთა სამინისტროს ინფორმაციით, 6 ივლისს, 112-ში შევიდა შეტყობინება საქართველოსა და ამერიკის ორმაგი მოქალაქეობის მქონე 2 პირის და მათი 4 წლის შვილის დაკარგვის შესახებ. შეტყობინების ინიციატორის თქმით, დაკარგულები დუშეთის რაიონში, ხადას ხეობაში იმყოფებოდნენ და მათთან დაკავშირება ვერ ხერხდებოდა.

პოლიციელებმა სოფელ წკერეში დაკარგული ტურისტების კუთვნილი ავტომანქანა და პირადი ნივთები აღმოაჩინეს. მაშველებმა დაკარგული ტურისტი ქალი, ავტომანქანიდან, დაახლოებით, 3 კილომეტრში, ხევში, ჩანჩქერის ძირში გარდაცვლილი 6 ივლისს იპოვეს. რაიან სმიტის ცხედარი 7 ივლისს, ხევში მდებარე ჩანჩქერის მიმდებარე ტერიტორიაზე ნახეს. იქვე ახლოს ნახეს მათი კუთვნილი ნივთებიც, ჩანთაც და ფულიც. რამდენიმე საათის შემდეგ ნახეს მათი 4 წლის შვილის გვამიც.

რაიან სმიტი მეუღლესთან ერთად დაახლოებით 7 წელია, რაც საქართველოში, მარნეულში ცხოვრობდა და აზერბაიჯანული ხალიჩების ბიზნესით იყო დაკავებული.