ქართული ოცნების წევრმა, გედევან ფოფხაძემ დეპუტატ დავით ჭიჭინაძის პარტიიდან გარიცხვის შესახებ გაკეთებული განცხადების გამო ბოდიში მოიხადა. ფოფხაძის თქმით, ფრაზა იმის შესახებ, რომ დავით ჭიჭინაძე პარტიიდან განსხვავებული შეხედულებების გამო გარიცხეს, მისი მხრიდან ემოციური იყო.

"ბოდიშს ვიხდი ამ ციტატის გამო. აი, ამ ფრაზის გამო ვთხოვ ჩემს კოლეგებს, რომ მომიტევონ ეს ციტატა, ემოციური იყო", - განაცხადა ფოფხაძემ.

ამის მიუხედავად, დეპუტატს პარტიასა და ჭიჭინაძეს შორის შუამავლის როლის შესრულება სურს.

"თავის დროზე დათო ჭიჭინაძე მე მარწმუნებდა, რომ მე არ უნდა წავიდე ქართული ოცნებიდან, ჩვენი გუნდურობა და ერთად ყოფნა არის ძალიან მნიშვნელოვანი. მეც ვაპირებ, იგივე გავაკეთო და ვესაუბრო დავითს ამ საკითხებთან დაკავშირებით", - თქვა ფოფხაძემ ჟურნალისტებთან საუბრისას.

ფოფხაძე მიიჩნევს, რომ აღნიშნული საკითხი პოლიტსაბჭოს მიერ უნდა შეიცვალოს და ამაში ყველა მისი თანაგუნდელი ჩაერთოს.

"თუ ვიღაცას ჰგონია, რომ მე წყალს ჩავიგუბებ პირში და დათოს [ჭიჭინაძეს] ვაგრძნობინებ, იცი რა, შენ რაღაც შეგეშალა და სწორად გაგრიცხეს, მე მაგას ვერ გავაკეთებ… მორალურად დავინგრევი, სახლიდან ვერ გამოვალ, ეგ რა კაცობაა", - ასე გამოეხმაურა გუშინ, 18 ივლისს, უმრავლესობის დეპუტატი გედევან ფოფხაძე ქართული ოცნებიდან დავით ჭიჭინაძის გარიცხვას.

ბოლო რამდენიმე დღეა დავით ჭიჭინაძე პარლამენტის თავმჯდომარეს, ირაკლი კობახიძეს აკრიტიკებს. მან განაცხადა, რომ ირაკლი კობახიძის მეთაურობით პარლამენტის ავტორიტეტი ძალიან დაბალია. საჯარო განცხადებების გამო ქართული ოცნების სამდივნოს გადაწყვეტილებით, პარლამენტის დეპუტატი დავით ჭიჭინაძე პარტიიდან გარიცხეს. ოფიციალურ განცხადებაში ნათქვამია, რომ ჭიჭინაძემ შეურაცხყოფა მიაყენა პოლიტიკური გუნდის წევრებს და ზიანი მიაყენა პარტიის იმიჯსა და ინტერესებს.