საპარლამენტო უმრავლესობის წევრი დავით ჭიჭინაძე პარლამენტის თავმჯდომარის, ირაკლი კობახიძის კრიტიკას აგრძელებს. ჭიჭინაძის თქმით, კობახიძის მეთაურობით პარლამენტის ავტორიტეტი ძალიან დაბალია.

დეპუტატმა პარლამენტის თავმჯდომარე კიდევ ერთხელ მას შემდეგ გააკრიტიკა, რაც ჭიჭინაძემ აღნიშნა, რომ კობახიძე და მაშინდელი პრემიერი, გიორგი კვირიკაშვილი "ადამიანების სიცოცხლის ხარჯზე კომპრომისზე წავიდნენ"

"თმენის ვალდებულება მართლა დეპუტატებს გვაქვს, რომ ასეთ თავმჯდომარეს ვითმენთ", - თქვა ჭიჭინაძემ.

16 ივლისს ტყიბულში, მინდელის შახტაში მომხდარი აფეთქებისას კიდევ 4 ადამიანი გარდაიცვალა. ამ თემის შეფასებისას კობახიძემ განაცხადა, რომ საპარლამენტო უმრავლესობას უნდოდა შრომის უსაფრთხოების გამკაცრება, თუმცა წინა მთავრობის ხისტმა პოზიციებმა მათ ამის საშუალება არ მისცა.

ჭიჭინაძის თქმით, ირაკლი კობახიძემ უნდა აიღოს პასუხისმგებლობა და თანამდებობიდან გადადგეს.