განათლების, მეცნიერების, კულტურისა და სპორტის სამინისტროების გაერთიანების შემდეგ მინისტრს, მიხეილ ბატიაშვილს ექვსი მოადგილე ჰყავს.

განათლების სამინისტროსთან კულტურის სამინისტროს შერწყმის შემდეგ, ყოფილი მინისტრი, მიხეილ გიორგაძე გაერთიანებული სამინისტროს პირველი მოადგილე გახდა. პროფესიული განათლების მიმართულებას ქეთევან ნატრიაშვილის ნაცვლად ლია გიგაური უხელმძღვანელებს.

სამინისტროში ზოგადი განათლების მიმართულებას ჩაიბარებს ირინა აბულაძე. აქამდე, აბულაძე მასწავლებელთა პროფესიული განვითარების ეროვნულ ცენტრში დირექტორის მოადგილის პოზიციას იკავებდა.

შალვა გოგოლაძე, რომელიც აქამდე კულტურისა და სპორტის მინისტრის მოადგილე იყო, გაერთიანებულ სამინისტროში სპორტის მიმართულებას ჩაიბარებს. კულტურის მიმართულებას კი ლევან ხარატიშვილი უხელმძღვანელებს. მანამდე, ხარატიშვილს კულტურისა და სპორტის სამინისტროში მინისტრის მოადგილის თანამდებობა ეკავა.

მინისტრის მოადგილეების თანამდებობებზე რჩებიან თეიმურაზ მურღულია და ალექსანდრე თევაზე.