სამეფო კარის თამაშების პირველი წიგნის გამოქვეყნების დღიდან 20 წელი გავიდა. მისი ავტორი ჯორჯ მარტინი მე-20 წლისთავის აღსანიშნად ახალ გამოცემას გამოუშვებს, სადაც 73 ილუსტრაცია და 48 ახალი ფოტო იქნება, რომელიც ვესტეროსის ცხოვრებას ასახავს.

ჯორჯ მარტინი საკუთარ ბლოგზე წერს, რომ გასულმა ორმა ათწლეულმა მისი ცხოვრება და კარიერა ძირეულად შეცვალა.

ყინულისა და ცეცხლის სიმღერის პირველი ნაწილი, სამეფო კარის თამაშები, 1996 წელს გამოიცა. ორი წლის შემდეგ მეფეთა ჯახი. 2000 წელს, ხმლების ქარიშხალი, ხოლო, 2005 წელს, ნადიმი ყვავებისთვის. ბოლო ნაწილი ცეკვა დრაკონებთან - 2011 წელს.

ფოტო: Getty Images

ჯორჯ მარტინმა ასევე დაადასტურა, რომ წიგნის მეექვსე ნაწილზე, ზამთრის ქარებზე მუშაობა ჯერ არ დაუსრულებია.

"შეფასებები საერთო ჯამში კარგი იყო, გაყიდვებს არაუშავდა",- იხსენებს მარტინი და ამატებს:

"წარმოდგენა არ მაქვს როდის დაიწყო ეს ყველაფერი, ან რამ გამოიწვია ამის დაწყება... ან რამდენ ხანს გაგრძელდება. თავიდან ვფიქრობდი რომ მთლიანი ამბავი 3 წიგნში ჩაეტეოდა და სულ 3 წელი დამჭირდებოდა ამისათვის, თითო წიგნზე ერთი წელი".

მისი თქმით, საიუბილეო წიგნი უფრო განსაკუთრებულ იქნება, იმაზე მეტი, ვიდრე უბრალოდ გადაბეჭდილი ვერსია.

ახალი გამოცემა ოქტომბერში გამოვა.