ოკუპირებული აფხაზეთის ვეტერანთა საზოგადოებამ ოთხოზორია-ტატუნაშვვილის სასანქციო სიის საპასუხოდ ე.წ. ხიშბა-სიგუას სია შექმნა. მათ სია აფხაზეთის დე ფაქტო ხელისუფლებას წარუდგინეს და მის განხილვას ითხოვენ. მათივე თქმით, სიას "ქართული სპეცსამსახურების მიერ გატაცებულების" სახელი ჰქვია.

"მიგვაჩნია, რომ ქართული მხარის მიერ სასანქციო სიის შექმნას არანაირი კავშირი არ აქვს საერთაშორისო საზოგადოების მცდელობასთან შექმნას სანდოობა და უფრო მეტად ართულებს სიტუაციას. სანქციებსა და ბლოკადას ჩვენი ხალხი პირველად არ განიცდის. საქართველოს მოთხოვნით 20 წელზე მეტია ევროკავშირს ჩვენი ხალხი ბლოკადაში ჰყავს და უარს გვეუბნება თავისუფალ გადაადგილებასა და განვითარებაზე", - ნათქვამია განცხადებაში.

  • ე.წ. ხიშბა-სიგუას სიაში შეყვანილი არიან:
  • ბაჩო ახალაია - თავდაცვის ყოფილი მინისტრი ;
  • იოსებ ახალაია - სამხედრო პოლიციის ყოფილი ხელმძღვანელი;
  • ირაკლი ბათიაშვილი - უშიშროების ყოფილი მინისტრი;
  • სლავიკ ბიგვავა - ქართული შეიარაღებული ფორმირების "ტყის ძმების" ლიდერი;
  • ავთანდილ ბულისკერია - "ტყის ძმების" წევრი;
  • რობერტ გამისონია - "ტყის ძმების" წევრი;
  • ზაზა გოგავა - სამხედრო შტაბის ყოფილი ხელმძღვანელი;
  • ბეჟან გოლანძია - შინაგან საქმეთა სამინისტროს თანამშრომელი;
  • ირაკლი ოქრუაშვილი - თავდაცვის ყოფილი მინისტრი;
  • ზაზა კაკულია - შსს-ს თანამშრომელი;
  • მეგის ქარდავა - საქართველოს თავდაცვის სამინისტროს სამხედრო პოლიციის დეპარტამენტის ყოფილი უფროსი;
  • გიორგი კარკარაშვილი;
  • დავით კეზერაშვილი - თავდაცვის ყოფილი მინისტრი;
  • თენგიზ კიტოვანი - თავდაცვის ყოფილი მინისტრი;
  • მამუკა ყურაშვილი - გენერალი;
  • იუსუფ ლაკაევი;
  • ვანო მერაბიშვილი - შს ყოფილი მინისტრი;
  • დავით ნოირაშვილი - გენერალი;
  • ემზარ პონიავა - "ტყის ძმების" წევრი;
  • ალიკ სამუშია - "ტყის ძმების" წევრი;
  • ომარ ხარჩილავა - "ტყის ძმების" წევრი;
  • დავით შენგელია - "ტყის ძმების" წევრი;
  • მიხეილ სააკაშვილი - საქართველოს ყოფილი პრეზიდენტი;
  • ბესიკ თოფურია - შსს-ს თანამშრომელი;
  • მანუჩარ ჩანგელია - შსს-ს ყოფილი თანამშრომელი;
  • რომან შამათავა - შსს-ს ყოფილი თანამშრომელი.

ოკუპირებულ ტერიტორიებზე საქართველოს მოქალაქეების წინააღმდეგ ჩადენილი დანაშაულისთვის ოთხოზორია-ტატუნაშვილის სიაში 33 პირი მოხვდა. პრემიერ-მინისტრ მამუკა ბახტაძის თქმით, სიაში შემავალი პირების მიმართ ყველა შესაძლო შეზღუდვის დასაწესებლად, მთავრობამ ის ღონისძიებები განსაზღვრა, რომლებიც საერთაშორისო ორგანიზაციებმა და პარტნიორებმა უნდა გაატარონ.