პრემიერ-მინისტრმა, მამუკა ბახტაძემ განაცხადა, რომ ე.წ. ტატუნაშვილი-ოთხოზორიას სიაში 33 პირია შეყვანილი. პრემიერის თქმით, სიაში შეყვანილი არიან პირები, რომლებიც 1991 წლიდან მხილებულები არიან ოკუპირებულ ტერიტორიებზე საქართველოს მოქალაქეებზე ისეთ დანაშაულებში, როგორიცაა მკვლელობა, გატაცება, წამება და ამ დანაშაულთა დაფარვა.

"წარმოდგენილი სია მომწურავი არ არის, რადგან სამართალდამცავი უწყებები უწყვეტ რეჟიმში აგრძელებენ მუშაობას და ეს სია ბუნებრივია, შეიძლება, უფრო მეტად გაიზარდოს", - განაცხადა ბახტაძემ.

ბახტაძის თქმით, სიაში შემავალი პირების მიმართ ყველა შესაძლო შეზღუდვის დასაწესებლად, მთავრობამ ის ღონისძიებები განსაზღვრა, რომლებიც საერთაშორისო ორგანიზაციებმა და პარტნიორებმა უნდა გაატარონ.

პრემიერის განმარტებით, ასევე, აღსრულებისთვის განისაზღვრა ის სახელმწიფო სტრუქტურები, რომლებმაც შესაბამისი ანგარიში პარლამენტსა და მთავრობას უნდა წარუდგინონ.

ტატუნაშვილის საქმე

არჩილ ტატუნაშვილის ცხედარი ოკუპირებული ტერიტორიიდან გარდაცვალებიდან 26 დღეში, 20 მარტს გადმოასვენეს. ტატუნაშვილი თითქმის ერთი თვის წინ, 22 თებერვალს ცხინვალის ციხეში გაურკვეველ ვითარებაში გარდაიცვალა. ოსური მხარის ვერსიით, ის იზოლატორში გადაყვანისას პოლიციელისთვის იარაღის წართმევა სცადა, საპასუხო ძალის გამოყენების შედეგად შეუძლოდ გახდა, კიბეებზე წაიქცა და მოგვიანებით საავადმყოფოში დაიღუპა.

სახელმწიფო უსაფრთხოების სამსახურის ინფორმაციით, ოსური მხარე აცხადებდა, რომ ტატუნაშვილი ინფარქტით დაიღუპა. გარდაცვლილის ცხედარი ოკუპირებულ ცხინვალს 24 თებერვალს უნდა გადმოესვენა, თუმცა დე ფაქტო ხელისუფლებამ მაშინ პოზიცია შეცვალა.