პატრიოტთა ალიანსის წევრმა ადა მარშანიამ დღეს, 13 ივლისს პარლამენტში მთავრობის ახალი შემადგენლობის მოსმენისას, ანტიდასავლური განცხადებით მიმართა პრემიერ მამუკა ბახტაძეს და თქვა, რომ ქვეყნის პრიორიტეტი ტერიტორიული მთლიანობის აღდგენა უნდა იყოს.

მარშანია ფიქრობს, რომ ამის მიღწევა რუსეთთან ურთიერთობის გაღრმავებითაა შესაძლებელი და არა ნატოში ინტეგრაციაზე "ოცნებით":

"ბატონო მამუკა, შეიძლება, ეს საკამათოა თქვენთვის, მაგრამ მე დიდი ეჭვის ქვეშ ვაყენებ იმას, რომ ჩვენი ერის ისტორიული ოცნებაა ნატოში შესვლა. მე დიდი ეჭვის ქვეშ ვაყენებ ამ ისტორიულ ნატვრას და მე არ მინდა, რომ ისტორიულ ნატვრად გადაგვექცეს ჩვენ სოხუმში და ცხინვალში შესვლა. მე კიდევ ერთხელ გავიმეორებ ჩემს ემოციურ, მაგრამ სწორ ნათქვამს: ჩვენ ნატოში შევდივართ, თუ ჩვენ სოხუმში შევდივართ. ნატო ჩვენ ამაში გვეხმარება, თუ გვიშლის ხელს"?