მას შემდეგ, რაც 31 ივლისს, საღამოს, ერევნის პოლიციის შენობა შეიარაღებულმა თავდამსხმელებმა დატოვეს, ადგილზე საგამოძიებო მოქმედებები მიმდინარეობს. გამომძიებლები უკვე შეუდგნენ ტერიტორიის შესწავლას. ინფორმაციას Ekhokavkaza Interfax-ზე დაყრდნობით ავრცელებს.

გამოცემის ცნობით, გამოძიება სისხლის სამართლის კოდექსის იმ მუხლით არის დაწყებული, რომელიც გულისხმობს შენობის დაკავებას მისი განადგურების მუქარით ან მის დაზიანებას იმისთვის, რომ აიძულოს ხელისუფლება, მოქალაქე ან ორგანიზაცია განახორციელოს რაიმე ქმედება. აღნიშული სასჯელად 12 წელს ითვალისწინებს.

გარდა ამისა, იმ პირთა მიმართ, რომლებსაც 17 ივლისიდან 31 ივლისის ჩათვლითერევნის პოლიციის შენობა ჰქონდათ დაკავებული, გამოძიება იარაღის უკანონო შეძენა-შენახვა-ტარების მუხლითაცაა დაწყებული. აღნიშნული სასჯელად თავისუფლების 8 წლით აღკვეთას გულისხმობს.

31 ივლისს პოლიციის მიერ ერევანში, ერებუნის გარეუბანში ჩატარებული სპეცოპერაციის შედეგად, შეიარაღებული დაჯგუფება პოლიციას ჩაბარდა. ადგილობრივი სამართალდამცავი უწყების თქმით, მათ სულ 20 ტერორისტი დააკავეს. არიან დაშავებულები.

ამბოხებულებმა განმარტეს, რომ მათი მისია შესრულებულია, რადგან ქვეყანაში აჯანყების ტალღა უკვე დაწყებულია:

"სახალხო მოძრაობა დაწყებულია და იმისთვის, რომ კიდევ არ გვყავდეს მსხვერპლი, ეს გადაწყვეტილება მივიღეთ. ჩვენმა ხალხმა უნდა იბრძოლოს, არ დავუშვებთ რომ ჩვენი ქვეყანა რუსეთის გუბერნია გახდეს. ვგრძნობთ, გამარჯვება ახლოსაა და მოუწოდებთ სომეხ ხალხს, მიიღოს გადაწყვეტილება - გადადგას პოზიტიური ნაბიჯი".

გამოცემის ცნობით, ერევნის ქუჩებში მომიტინგეები კი აცხადებდნენ, რომ მიუხედავად ამბოხებულების დანებებისა, ისინი აქციების შეწყვეტას არ აპირებენ. მიტინგის წამყვანმა, ტიგრან ხზმალიანმა განმარტა, რომ აქცია დღეს, საღამოს 7 საათზე ისევ განახლდება.

17 ივლისს ოპოზიციური მოძრაობის - დამფუძნებელთა პარლამენტის მეთაურის, ჟირაირა სეფილიანის გათავისუფლების მოთხოვნით შეიარაღებული დაჯგუფება პოლიციის შენობაში შეიჭრა და მძევლები აიყვანა. ისინი ასევე მოითხოვენ სომხეთის პრეზიდენტის, სერჟ სარგისიანის გადადგომასა და ხელისუფლების ცვლილებას. ამ დროის განმავლობაში მათ ასევე მძევლებიც ჰყავდათ აყვანილი. მომხდარს მოჰყვა მსხვერპლიც, ასევე დაშვდა რამდენიმე პირი.

სომხეთში მიმდინარე მოვლენების შესახებ დეტალურ ინფორმაციას შეგიძლიათ გაეცნოთ აქ: