რადიო თავისუფლების სომხური ბიურო სომხეთის შინაგან საქმეთა სამინისტროს პრესსპიკერზე დაყრდნობით ავრცელებს ინფორმაციას, რომ ერევანში, პოლიციის შენობაში გამაგრებულმა ამბოხებულებმა 30 წლის პოლიციელი, იურა ტეპანოსიანი მოკლეს.

სომხეთის შსს–ს პრესსპიკერის, აშოტ აგარონიანის თქმით, პოლიციელი, რომელიც ამბოხებულების მიერ დაკავებული შენობიდან 350–400 მეტრში იმყოფებოდა, სნაიპერის ტყვიამ იმსხვერპლა.

ამის პარალელურად, ეროვნული უსაფრთხოების სამსახურმა ამბოხებულებს რამდენიმე საათი მისცა იარაღის დასაყრელად და ჩასაბარებლად, რადგან მათი თქმით, საფრთხე ექმნება ეროვნულ უსაფრთხოებასა და მოქალაქეთა სიცოცხლეს. უსაფრთხოების სამსახურის ცნობით, ამბოხებულებმა უმისამართოდ გახსნეს ცეცხლი 29 ივლისის გვიან ღამით მოსახლეობისა და სამართალდამცავების მიმართულებით.

აღნიშნულ ინციდენტს პოლიციის მიმდებარედ შეკრებილ მოქალაქეებსა და სპეცრაზმს შორის შეტაკება მოჰყვა, რა დროსაც დაშავდა ამდენიმე ადამიანი, მათ შორის ჟურნალისტებიც.

ერევანში ამბოხი 17 ივლისს დაიწყო. შეიარაღებულმა თავდამსხმელებმა პოლიციის შენობა ალყაში მოაქციეს, შიგნით შეიჭრნენ და მძევლები აიყვანეს. მათი მთავარი მოთხოვნა ოპოზიციური დაჯგუფების ლიდერის, ჟირაირა სეფილიანის გათავისუფლება, ქვეყნის პრეზიდენტის გადადგომა და ძალაუფლების "ხალხისთვის გადაცემაა".