Tbilisi Open Air ქართული ბენდების გადაწყვეტილებას, ფესტივალზე აღარ გამოსვლის შესახებ, ეხმიანება და აცხადებს, რომ მათ სიტუაციის გამოსწორების შანსი არ მიეცათ.

"გუშინ Kung Fu Junkie-სთან ჩვენ მივედით ერთგვარ შეთანხმებამდე და დღეს წესით მათ უნდა დაეკრათ UNKLE-ის შემდეგ, თუმცა მათ აზრი შეიცვალეს და სამწუხაროდ ჩვენ სიტუაციის გამოსწორების შანსი არ მოგვეცა. ჩვენთვის აბსოლუტურად გასაგებია მათი წყენა, რის გამოც ძალიან ვწუხვართ და ბოდიშს ვუხდით როგორც მათ, ასევე მათ მსმენელს. დანარჩენმა ორმა ბენდმაც გუშინ შექმნილი დისკომფორტის გამო დღეს უარი თქვა დაკვრაზე".

Open Air-ის თქმით, ფესტივალი, პირველ რიგში, ქართული არტისტებისთვის შეიქმნა.

დღეს სამმა ქართულმა ბენდმა, Kung Fu Junkie-მ, Young Georgian Lolitaz-მა და Backwarmer-მა ფეისბუკის საშუალებით განაცხადეს, რომ Tbilisi Open Air-ზე, ტექნიკური პრობლემების გამო ვერ შეძლეს წინასწარ საუნდჩეკის გავლა, რომლის გარეშეც მაყურებელს ხარისხიან შესრულებას ვერ შესთავაზებენ და სწორედ ეს გახდა მათი პროტესტის მიზეზი.

Tbilisi Open Air ყოველწლიური ფესტივალია, რომელიც ღია ცის ქვეშ, ცოცხალი მუსიკის თანხლებით იმართება. წელს მუსიკალური ღონისძიება 29 ივლისს Lisi Wonderland-ზე გაიხსნა და ის სამი დღით გაგრძელდება.

გაიგეთ მეტი:

რატომ აღარ გამოვა Tbilisi Open Air-ზე სამი ქართული ბენდი