აშშ-ის საელჩოსთან დუშეთში მოკლული სმიტების ოჯახის სამოქალაქო სამძიმარი მიმდინარეობს. საელჩოსთან მოქალაქეებს ყვავილები, სანთლები და სათამაშოები მიაქვთ. მოკლული ოჯახის მიმართ სამძიმარი გამოთქვა საქართველოში აშშ-ის ელჩის მოვალეობის შემსრულებელმა, ელიზაბეთ რუდმაც.

"მწუხარებას გამოვთქვამთ და შოკირებული ვართ ამ მკვლელობის გამო. ვუერთდებით ყველა აქ მყოფ თანამემამულეს და უამრავ ადამიანს, განსაკუთრებით, მარნეულში, სადაც სმიტების მეგობრები ცხოვრობენ. ყველაფერს გავაკეთებთ რაიანის [სმიტის] ოჯახის დასახმარებლად, როდესაც ისინი საქართველოში ჩამოვლენ", - განაცხადა რუდმა.

რაიან და ლორა სმიტებს აშშ-საქართველოს ორმაგი მოქალაქეობა ჰქონდათ. 4 წლის შვილთან ერთად მარნეულში ექვს წელზე მეტხანს ცხოვრობდნენ.

სმიტების გაუჩინარების შესახებ "112-ში" შეტყობინება 6 ივლისს შევიდა. შინაგან საქმეთა სამინისტროს განცხადებით, შეტყობინების ინიციატორის თქმით, დაკარგულები დუშეთის რაიონში, ხადას ხეობაში იმყოფებოდნენ და მათთან დაკავშირება ვერ ხერხდებოდა.

უწყების განმარტებით, ხადას ხეობაში ერთ-ერთი ჩანჩქერის მიმდებარე ტერიტორიაზე რაიანი და მისი ოთხი წლის შვილი ურთიერთშელაპარაკების ნიადაგზე 19 წლის მწყემსმა სანადირო თოფით მოკლა. ხოლო ლორა შემთხვევის ადგილიდან გაქცევის მცდელობისას ხევში გადავარდა და გარდაიცვალა.

მკვლელობაში ბრალდებული უკვე დაკავებულია და მას სამუდამო პატიმრობა ემუქრება. შსს-ს განმარტებით, დაკავებული ბრალს აღიარებს.

საქმის დეტალები

უწყების განცხადებით, ქალი ჩანჩქერის პირას, გარდაცვლილი იპოვეს და პირველადი დათვალიერების შედეგად ძალადობის კვალი არ აღენიშნებოდა. 7 ივლისს კი კაცის, რაიან სმიტის ცხედარი ჩანჩქერის მიმდებარე ტერიტორიაზე აღმოაჩინეს. ამავე დღეს შსს-მ განაცხადა, რომ პირველადი დათვალიერებით არც ერთ გარდაცვლილს ძალადობის ნიშნები არ აღენიშნებოდა.

შსს-ს განმარტებით, თავდაპირველად გამოძიება სისხლის სამართლის კოდექსის 116-ე მუხლის მე-2 ნაწილით დაიწყო, რაც გაუფრთხილებლობით სიცოცხლის მოსპობას გულისხმობს. სამედიცინო ექსპერტიზის პირველადი მონაცემების მიღების შემდეგ საქმე განზრახ მკვლელობის მუხლით გადაკვალიფიცირდა.

როგორც უწყების განცხადებაშია ნათქვამი, საგამოძიებო ექსპერიმენტის ჩატარების შედეგად სამართალდამცველებმა აღმოაჩინეს 2014 წელს დაბადებული მცირეწლოვნის ცხედარი 9 ივლისს იპოვეს.

გამოძიება დამამძიმებელ გარემოებაში ჩადენილი, ორი ან მეტი პირის, მათ შორის, დამნაშავისათვის წინასწარი შეცნობით არასრულწლოვნის განზრახ მკვლელობის ფაქტზე, საქართველოს სსკ-ს 109-ე მუხლის მე-2 ნაწილის "ბ" და მე-3 ნაწილის "ა" ქვეპუნქტით მიმდინარეობს.

როგორც შსს აცხადებს, გამოძიების ფარგლებში გარდაცვლილთა ცხედრებს უტარდება შესაბამისი ექსპერტიზა. ჩადენილი დანაშაული უვადო თავისუფლების აღკვეთას ითვალისწინებს. ბრალდებულის შერაცხადობის საკითხის გასარკვევად კი ჩატარდება ფსიქიატრიული ექსპერტიზა.

გარდაცვლილები საქართველოში 6 წელზე მეტი ცხოვრობდნენ, ხოლო ორმაგი მოქალაქის სტატუსი მათ 2012 წელს მიიღეს.