თურქეთში სახელმწიფო გადატრიალების წარუმატებელი მცდელობის შემდეგ, ერდოღანის მიერ გამოცხადებული სამხედრო ძალების ე.წ. წმენდა გრძელდება, თუმცა თურქეთის მოკავშირე NATO-ში - აშშ განმარტავს, რომ გენერლებისა და ოფიცრების თანამდებობებიდან გათავისუფლებამ/დაკავებამ ISIS-სთან ბრძოლასთან დაკავშირებული თანამშრომლობითი ქმედებები შეასუსტა. ინფორმაციას Reuters ავრცელებს.

გამოცემის ცნობით, 28 ივლისს ქვეყნის მასშტაბით 99 პოლკოვნიკი გენერლი და ადმირალი ჩინით მას შემდეგ დააწინაურეს, რაც 2000-მდე სამხედრო პირი თანამდებობიდან გაათავისუფლეს, მათ შორის ქვეყნის მასშტაბით გენერლისა და ადმირლის პოსტზე მყოფი პირების 40%.

15 ივლისს თურქეთში სახელმწიფო გადატრიალების წარუმატებელ მცდელობაში ქვეყნის პრეზიდენტმა, რეჯეპ ტაიპ ერდოღანმა ფეტულა გიულენი დაადანაშაულა, რომელმაც, თავის მხრივ, ბრალდებები უარყო.

აღნიშნულის გამო, გიულენთან შესაძლო კავშირის ბრალდებით თურქეთში ათასობით პოლიციელი, მოსამართლე, მასწავლებელი, დიპლომატი, ჟურნალისტი და სხვა დარგში მომუშავე მოქალაქეები გაათავისუფლეს, რომელთა საერთო რაოდენობა 66 ათასს აღწევს, საიდანაც 43 ათასი მხოლოდ საგანმანათლებლო სექტორიდან გათავისუფლებული მოქალაქეები არიან.

ბოლო მონაცემებით:

  • გარდაცვლილია 246 ადამიანი.
  • დაშავებულია 1400-ზე მეტი მოქალაქე.
  • დახურულია 130 მედია საშუალება.
  • გაცემულია 42 ჟურნალისტის დაკავების ორდერი.
  • სამსახურიდან გაშვებულია 66 ათასამდე საჯარო მოხელე.
  • ქვეყანაში სამთვიანი საგანგებო მდგომარეობაა გამოცხადებული.

15 ივლისს თურქეთში ხელისუფლების დამხობის მიზნით ქვეყნის რამდენიმე ლოკაციაზე შეიარაღებული დაჯგუფების თავდასხმას 300-მდე ადამიანის სიცოცხლე ემსხვერპლა, აჯანყებასთან კავშირის ბრალდებით თანამდებობიდან გადააყენეს და დააკავეს ათასობით მოსამართლე, მაღალი თანამდებობაზე მყოფი სამხედროები, პოლიციელები და სამოქალაქო პირები.

თურქეთში მომხდარი ამბოხის გამომწვევი მიზეზების, მისი ორგანიზატორებისა და მომხდარის შესახებ დეტალურ ინფორმაციას შეგიძლიათ გაეცნოთ აქ: