კომპანია Airbus-მა ახალი და ყველაზე დიდი სატვირთო თვითმფრინავი Beluga XL წარადგინა. ახალი მოდელი მის კორპუსზე დატანილი ნახატის გამო "მომღიმარი ვეშაპის" სახელით გახდა ცნობილი. კომპანიის ინფორმაციით, Beluga XL ყველა სახის საჭირო გამოცდა ზაფხულშივე გაივლის, მათ შორის, სატესტო ფრენასაც. მოდელი ექსპლუატაციაში ოფიციალურად 2019 წელს ჩაეშვება.

Beluga XL გაზრდილი ტვირთტევადობით გამოირჩევა, მოდელს 6 ტონით უფრო მეტი ტვირთის ტარება შეუძლია, ვიდრე მანამდე არსებულ ყველაზე დიდ მოდელს. ახალი Beluga XL უკვე არსებული ფართო ფუზელაჟიანი A-330-ის ბაზაზე ააწყვეს. პირველი ასეთი მოდელის აწყობა Airbus-მა 2015 წელს დაიწყო, სამუშაო პროცესი გასულ კვირას ტულუზაში დასრულდა.

Airbus-მა ახალი თაობის სატვირთო თვითმფრინავების წარმოების შესახებ 2014 წელს განაცხადა. ახალი სატვირთო მოდელების წარმოების საკითხი მას შემდეგ დადგა დღის წესრიგში, რაც გაიზარდა მოთხოვნა კომპანიის კიდევ ერთ მოდელზე A-320-ზე. ახალი სატვირთოს მოდელებს უმეტესად გამოიყენებენ, ახალი თვითმფრინავის დეტალების გადასატანად. ამ მიმართულებით ახალი Beluga XL კიდევ უფრო ეფექტურია.

ახალი მოდელი უფრო გრძელი, ფართო და ტევადია. ამასთანავე, ახალ მოდელს 6 ტონით უფრო მეტი ტვირთის გადატანა შეუძლია. Beluga XL-ს თავისი ზომიდან გამომდინარე, შეეძლება Airbus-350-ის ორივე ფრთის კონსოლის ერთდროულად გადატანა. მანამდე არსებულ ყველაზე დიდ მოდელს კი მხოლოდ ერთი ფრთის კონსოლის ტრანსპორტირება შეეძლო.

მოდელი, თავიდან, ყველა სახმელეთო შემოწმებას გაივლის, ხოლო ამის შემდეგ მისი სატესტო ფრენაც შედგება.