გიორგი კვირიკაშვილმა მთავრობის და პარტიის თავმჯდომარის პოსტის დატოვების შემდეგ, ქართული ოცნება დატოვა. ამის შესახებ ინფორმაცია ოფიციალურად დაადასტურეს ქართულ ოცნების პრესსამსახურში. ასევე ჟურნალისტებთან საუბრის დროს, თბილისის მერმა და ქართული ოცნების გენერალურმა მდივანმა კახა კალაძემ განაცხადა, რომ გიორგი კვირიკაშვილმა პარტია საკუთარი სურვილით განცხადების საფუძველზე დატოვა.

ქართული ოცნების პოლიტსაბჭოს წევრის, თამარ ჩუგოშვილის განცხადებით კი გიორგი კვირიკაშვილს პარტიის პოლიტსაბჭოშიც პრემიერ-მინისტრი მამუკა ბახტაძე შეცვლის.

ქართული ოცნების მმართველობის პერიოდში მესამე პრემიერ-მინისტრი, გიორგი კვირიკაშვილი 13 ივნისს გადადგა. კვირიკაშვილის ადგილი კი იმ დროს ფინანსთა მინისტრმა მამუკა ბახტაძემ დაიკავა.

საქართველოს მთავრობის გადადგომის მოთხოვნით თბილისში აქციები დაახლოებით ერთი თვის განმავლობაში იმართებოდა. თავდაპირველად, ეს მოთხოვნა კლუბებში ბასიანსა და გალერიში სპეცოპერაციის ჩატარების შემდეგ გაჩნდა. მოგვიანებით, თბილისის საქალაქო სასამართლომ ხორავას ქუჩაზე მოკლული ორი არასრულწლოვნის საქმეზე გადაწყვეტილება მიიღო, რომლითაც დადგინდა, რომ პროკურატურას დავით სარალიძის მკვლელი დაკავებული არ ჰყავდათ. ამ აქციაზეც გაჟღერდა იგივე მოთხოვნა.

ბოლო ერთი თვის განმავლობაში საქართველოში 10-მდე აქცია ჩატარდა. ყველა შემთხვევაში ისმოდა მთავრობის გადადგომის მოთხოვნა.

მანამდე გიორგი კვირიკაშვილმა განაცხადა, როგორც კი დარწმუნდება, რომ მისი გადადგომა "ქვეყანას წაადგება", თანამდებობას დატოვებს.