სამხრეთ ოსეთის დე ფაქტო რესპუბლიკის პრეზიდენტმა, ანატოლი ბიბილოვმა განაცხადა, რომ ე.წ. საზღვართან ნატოს გამოჩენას რუსეთთან ერთად თავდაცვის ერთიანი ძალებით დავხვდებიან.

როგორც გამოცემა რესი წერს, ბიბილოვმა ამის შესახებ რუსულ გამოცემა იზვესტიესთან ინტერვიუში ისაუბრა. დე ფაქტო პრეზიდენტმა 2021 წლისთვის საქართველოს ნატოში გაწევრიანების მისწრაფება შეაფასა.

"საქართველოს უფლება აქვს ნებისმიერ ალიანს შეუერთდეს, სამხრეთ ოსეთი ამას ვერ აღუდგება. ამავე დროს ეს არ შეიძლება განგაშს არ იწვევდეს, ამიტომაც კეთდება ყველაფერი, რათა მოსალოდნელი პროვოკაციებისა და ძალადობრივი სცენარებისგან მოსახლეობა დავიცვათ. სწორედ ამიტომ, სამხრეთ ოსეთი რუსეთთან უსაფრთხოების ერთიან კონტურს ქმნის. ამ თვალსაზრისით მიღებული ზომები უნდა პასუხობდეს, მათ შორის, ჩვენს საზღვრებთან ნატოს ძალების სავარაუდო გამოჩენას", - განაცხადა ბიბილოვმა.

ამავე დროს, ბიბილოვმა განმარტა, რომ ეს დე ფაქტო რესპუბლიკის ტერიტორიაზე რუსული ძალების გაძლიერებას არ ნიშნავს.