პარტია ქართული ოცნება - დემოკრატიული საქართველოს ერთ-ერთმა ლიდერმა ზაქარია ქუცნაშვილმა, On.ge-სთან საუბარში განაცხადა, რომ NDI-ის მიერ გამოქვეყნებულ კვლევას ისინი ყურადღებას არასოდეს აქცევდნენ და მათთვის ყველაზე სანდოა ხალხის მიერ უშუალოდ არჩევნებზე გაკეთებული არჩევანი:

"2012 წლიდან მოყოლებული ეს პოზიცია გვაქვს და ვამბობთ რომ ვენდობით ქართველი ხალხის რეალურ ნებას, დამყარებულს ხმის მიცემაზე და არა დამყარებულს სოცილოგიურ კვლევაზე. ჩვენ ამ კვლევის შედეგებს არასოდეს არ ვაქცევდით ყურადღებას".

ქუცნაშვილმა იმ კვლევის მიერ დადგენილ იმ ტენდენციაზეც ისაუბრა, სადაც გამოკითხულთა 38%-ს ჯერჯერობით არ გადაუწყვეტია თუ ვის მისცემდა ხმას:

"ჩვენი ამომრჩეველის გარანტიულობა და იდეოლოგიზირება საკმაოდ დაბალია. აქედან გამომდინარე, როგორც ყოველთვის, პარტიის მხარდამჭერთა რაოდენობა არჩევნების დროს რამოდენიმეჯერ აღემატება ჯერ ჩამოუყალიბებელი ამომრჩევლის რაოდნეობას. არ არის მყარი პარტიული სისტემა, სადაც წინასწარ ჩამოყალიბებული არის განწყობები რომელიმე პარტიის სასარგებლოდ".

ხვალ რომ საპარლამენტო არჩევნები ტარდებოდეს, NDI-ის მიერ გამოკითხულთა 38%-მა არ იცის ვის მისცემდა ხმას. ეს კითხვა ამომრჩევლებს NDI-მ დაუსვა.

გამოკითხულთა 17% პირველ არჩევნად ქართულ ოცნებას ასახელებს, 13% კი - ნაციონალურ მოძრაობას. პაატა ბურჭულაძის პარტიას ხმას მისცემდა 4%, ირმა ინაშვილის პატრიოტთა ალიანსს კი - 3%.