რუსეთის ჯაშუშობაში ბრალდებული, პეტრე დევრიშაძე, რომლის კომპანიამაც სახელმწიფო ტენდერები მოიგო ამბობს, რომ მის შესახებ მასალის მომზადებაში მედიას ფული გადაუხადეს. საუბარია სტუდია მონიტორის საგამოძიებო ფილმზე, რომლის მიხედვითაც, რუსეთის ჯაშუშობაში ბრალდებულის ოჯახის კომპანიებმა თავდაცვისა და შინაგან საქმეთა სამინისტროების რამდენიმე მილიონი ტენდერები მოიგო.

"მოიგო ჩემმა კომპანიამ, რადგან დავდე დაბალი ფასი, 230 ათასი ლარი დავაკელი იმიტომ, რომ მე შემეძლო მაგ ფასად მიმეწოდებინა და მეც დამრჩენოდა მოგება, მაგრამ კონკურენტებმა ეს ვეღარ აიტანეს", - განაცხადა დევრიშაძემ თავდაცვის სამინისტროს მიერ გამოცხადებულ ტენდერზე რუსთავი 2-თან სატელეფონო კომენტარში.

ამავე არხთან საუბრისას მასალის ავტორი, გიორგი მგელაძე ამბობს, რომ არც დევრიშაძეს იცნობს და არც მის კონკურენტებს.

სტუდია მონიტორის ჟურნალისტურ გამოძიებაში ნათქვამი იყო, რომ პეტრე დევრიშაძემ, რომელმაც რუსეთის სპეცსამსახურებთან თანამშრომლობა აღიარა, შინაგან საქმეთა და თავდაცვის სამინისტროს ტენდერებს იგებს.

თავდაცვის სამინისტროს ცნობით კი, გამოცხადებულ ღია ტენდერებში მონაწილე კომპანიებისა და მისი დამფუძნებლების წარსული საქმიანობის შესახებ ინფორმაციას სახელმწიფო უწყება არ ფლობს.