"აბსოლუტურად დაფარული არის იურიდიული პირების შესახებ მონაცემები ტენდერის ფარგლებში", - ასე ეხმაურება საპარლამენტო უმრავლესობის დეპუტატი, სოფო კილაძე რუსეთის ჯაშუშობაში ბრალდებულის, პეტრე დევრიშაძის ღია ტენდერებში გამარჯვებას. მისი განმარტებით, ტენდერის მიმდინარეობის დროს მონაწილე პირების შესახებ ინფორმაცია დახურულია.

"ოპოზიციას თუ რამე უნდა ქვეყნისთვის სასიკეთო, იფიქრონ კანონდებლობაში ცვლილებაზე. მაგრამ თავდაცვისა და შს სამინისტრო, როგორც კანონის აღსრულებაზე პასუხისმგებელი ორგანოები თავიანთი მიმართულებით, ნამდვილად არანაირი დარღვევა მათ არ განუხორციელებიათ", - ამბობს კილაძე.

სტუდია მონიტორის ჟურნალისტური გამოძიებაში ნათქვამი იყო, რომ პეტრე დერვიშაძე, პირი, რომელმაც რუსეთის სპეცსამსახურებთან თანამშრომლობა აღიარა, საქართველოში შინაგან საქმეთა სამინისტროსა და თავდაცვის სამინისტროს მიერ გამოცხადებულ ტენდერებს იგებს. ოპოზიცია კი ამის გამო, ორივე უწყების მინისტრებს პარლამენტში იბარებს.

თავდაცვის სამინისტროს განცხადებით, გამოცხადებულ ღია ტენდერებში მონაწილე კომპანიებისა და მისი დამფუძნებლების წარსული საქმიანობის შესახებ ინფორმაციას სახელმწიფო უწყება არ ფლობს.