"ჩვენ გვჭირდება ევროპული აღმოსავლეთის პოლიტიკა", - ამის შესახებ გერმანიის საგარეო საქმეთა მინისტრმა ჰაიკო მაასმა, საქართველოს საგარეო საქმეთა მინისტრთან, დავით ზალკალიანთან შეხვედრის დროს განაცხადა.

მისი განცხადებით, გერმანია მხარს უჭერს საქართველოს ევროკავშირთან დაახლოების კურსს და ამ გზაზე უმნიშვნელოვანესი ეტაპი საქართველოსთვის უვიზო მიმოსვლის რეჟიმის მინიჭებაა.

„თბილისში არა მარტო პარლამენტის წინ ფრიალებს ევროკავშირის დროშა, ბევრ ქვეყანაში ეს ესე არ არის, ამ ლურჯ დროშას ყვითელი ვარსკვლავებით თბილისში ყველგან შეხვდებით და ეს ჩვენ გვახარებს. ეს არის გარეგნული გამოხატულება იმისა, რასაც ქართველები შინაგანად გრძნობენ. ამიტომაც ჩვენ ჩვენი პოლიტიკა უნდა დავუახლოვოთ ამას, უკეთესი პოლიტიკა ვაწარმოოთ ისეთი ქვეყნების მიმართ, როგორიც საქართველოა", - განაცხადა ჰაიკო მაასმა.

მისი თქმით, საქართველომ მნიშვნელოვანი რეფორმების ტემპი აიღო და ამ თვალსაზრისით რეგიონში წამყვანი ქვეყანაა.

"ამაში ჩვენ მომავალშიც გვინდა მხარი დაგიჭიროთ“-განაცხადა გერმანიის საგარეო უწყების ხელმძღვანელმა.

საკუთარ გამოსვლაში მან ასევე ყურადღება გაამახვილა ნატო-საქართველოს პარტნიორობაზე და ნატოს მოახლოებულ სამიტზე. მისი თქმით, საქართველო ნატოს მჭიდრო პარტნიორია და ეს გამოიხატება როგორც საერთაშორისო უსაფრთხოების უზრუნველყოფის პროცესში საქართველოს აქტიური ჩართულობით, ასევე ნატოს სამიტში საქართველოს მონაწილეობით.

"უსაფრთხოების საკითხებშიც ჩვენ საქართველოს გვერდით ვდგავართ და ბოლომდე ვიდგებით, ეს ეხება კონფლიქტურ რეგიონებსაც. საქართველოს ტერიტორიული მთლიანობა ჩვენთვის არ არის ვაჭრობის საგანი და ამაში მომავალიც არაფერი არ შეიცვლება", - განაცხადა მინისტრმა.

ჰაიკო მაასის განცხადებით, მნიშვნელოვანია, რომ საქართველო წარმოდგენილი იქნება ფრანკფურტის წიგნის ბაზრობაზე საპატიო სტუმრის სახით.

"ჩვენ ძალიან გვიხარია, რომ 70 შესანიშნავი ქართველი მწერალი იქნება წარმოდგენილი გამოფენაზე, მათი ნაშრომები და ეს წიგნები გვიჩვენებენ, რომ ქართველები ევროპულად აზროვნებენ და ევროპულად გრძნობენ. მართლაც ისინი გვიდასტურებენ, რომ საქართველო ძალიან ახლოს არის ევროპასთან", - განაცხადა მინისტრმა.

დავით ზალკალიანისა და ჰაიკო მაასის შეხვედრა ბერლინში საქართველოს საგარეო საქმეთა მინისტრის ვიზიტის ფარგლებში გაიმართა.