სახალხო დამცველის, ნინო ლომჯარიას განცხადებით, იმის მიუხედავად, რომ სკოლებში ბულინგის პრობლემა ძალიან ფართოდაა გავრცელებული, საგანმანათლებლო სივრცეში არ არსებობს ბულინგის რეაგირებისა და შეტყობინების სისტემა. ამის შესახებ ლომჯარიამ ადამიანის უფლებების სწავლებისა და სასწავლო გარემოს შესახებ ზოგადსაგანმანათლებლო სივრცეში კვლევის პრეზენტაციის შემდეგ ისაუბრა. კვლევა ადამიანის უფლებათა სწავლების კუთხით არსებულ პრობლემებს შეეხება.

"არაერთი პრობლემის სათავე, რაც დღეს არსებობს საქართველოში, არის სწორედ განათლება და არის სწორედ ის, რომ სკოლის ასაკში ჩვენ ახალგაზრდებს, ბავშვებს, ვერ ვაძლევთ სათანადო ინფორმაციას ადამიანის უფლებების შესახებ", - განაცხადა ლომჯარიამ ჟურნალისტებთან საუბრისას.

კვლევა აღნიშნული პრობლემების აღმოფხვრისთვის რეკომენდაციებსაც აერთიანებს. მათ შორისაა სასწავლო გეგმის დახვეწა, სხვადასხვა საგანში ადამიანის უფლებების საკითხების ინტეგრირება, მოსწავლეების ანონიმურობის დაცვა ამ პრობლემებზე საუბრისას.